Partia Demokratike ka reaguar në lidhje me zgjedhjen e deputetit të PS, Fidel Ylli në krye të Komitetit Olimpik Shqiptar.
Përmes një deklarate për shtyp, ish-deputetja e PD, Albana Vokshi tha se Edi Rama po politizon Komitetin Olimpik Shqiptar përmes emërimit të “shërbëtorit”të tij, Fidel Ylli.
Sipas Vokshit, deri pak kohë më parë, në statutin e Komitetit Olimpik, që miratohet nga Ministria e Arsimit, përcaktohej se “nuk lejohet që politikanë aktivë të konkurojnë për të qenë në organet drejtuese të Komitetit”.
Më tej ajo sqaron se arsyeja për të cilën ky përcaktim është hequr ka lidhje me vendimin e kryeministrit për të zgjedhur president të Komitetit Olimpik Shqiptar deputetin e tij, Fidel Ylli.
Deklaratë e plotë
Të dashur qytetarë!
Këto janë ditë të vështira për shumë prej jush.
Me mijëra njerëz janë dëmtuar nga përmbytjet, por nuk kanë mbështetje.
Me mijëra të tjerë jetojnë akoma në çadra.
Qindra e mijëra janë të papunë, por qeveria nuk bën ndonjë përpjekje për t’i punësuar.
Hallet e njerëzve janë të shumta, por Edi Rama mendon vetëm për vete.
Së fundmi, plani i tij është të uzurpojë edhe sportet, duke targetuar politizimin e Komitetit Olimpik Shqiptar përmes emërimit të shërbëtorit të tij, Fidel Ylli.
Qeveria që ha mish me flori në Dubai ka zhbërë rregullat që pengonin kontrollin nga politika të sportit.
Deri pak kohë më parë, në statutin e Komitetit Olimpik, që miratohet nga Ministria e Arsimit, përcaktohej se “nuk lejohet që politikanë aktivë të konkurojnë për të qenë në organet drejtuese të Komitetit”.
Arsyeja për të cilën ky përcaktim është hequr ka lidhje me vendimin e Edi Ramës për të zgjedhur president të Komitetit Olimpik Shqiptar deputetin e tij Fidel Ylli.
Përfshirja e një politikani aktiv, deputet i Partisë Socialiste është tentativë për të prishur garën, është emërim i dhunshëm i një politikani në sport, kundër çfo standardi botëror.
Plani i Edi Ramës për të kapur edhe organizmat e pavarur të sportit është i dëmshëm për sportin dhe si i tillë i papranueshëm.
Për Partinë Demokratike, Komiteti Olimpik Shqiptar duhet të mbetet një organizëm i pavarur, në mënyrë që të mos i shërbejë interesave të pushtetit, por sportistëve të talentuar dhe imazhit të Shqipërisë në botë./Opinion.al
