Qeveria ka vendosur rritjen e pagës minimale për punonjësit në të gjithë Republikën e Shqipërisë.
Me anë të një VKM-je, nga 1 janari 2021 paga minimale do të jetë 30 000 lekë, nga 26000 lekë që është tani.
Për të marrë këtë pagë duhet të kesh 176 orë pune në muaj gjatë një periudhe mujore normale, ndërsa shtesat e orëve të punës jepen mbi pagën bazë.
Kujtojmë që ky vendim i qeverisë ka ardhur pas një miratimit nga ana e Këshillit Kombëtar të Punës në tetor të këtij viti. Ndërkaq, ky ka qenë një artikulim i kryeministrit Rama në kongresin e Partisë Socialiste të zhvilluar në shkurt.
“Nga 1 janari i vitit 2021 paga minimale do jetë 300 mijë lekë. Nuk do ketë më njerëz që punësohen me më pak se 30 mijë lekë. Ne nuk jemi në fillim e as në fund të një projekti për një rilindje shqiptare”, ka theksuar Rama në Kongres.
Vendimi:
Këshilli i ministrave vendosi:
1. Paga bazë minimale mujore, për punonjësit, në shkallë vendi, që është e detyrueshme të zbatohet nga çdo person, juridik a fizik, vendas ose i huaj, të jetë 30 000 (tridhjetë mijë) lekë.
2. Paga bazë minimale mujore jepet për 174 orë pune në muaj, të kryera gjatë kohës normale të punës.
3. Paga bazë minimale orare të jetë 172.4 (njëqind e shtatëdhjetë e dy pikë katër) lekë.
4. Shtesat me karakter të përhershëm jepen mbi pagën bazë.
5. Vendimi nr.809, datë 26.12.2018, i Këshillit të Ministrave, “Për përcaktimin e pagës minimale në shkallë vendi”, shfuqizohet.
Ky vendim hyn në fuqi pas botimit në “Fletoren zyrtare” dhe i shtrin efektet nga data 1 janar 2021./Opinion.al
