Edhe sot përmes rrjeteve sociale është njoftuar mbajtja e një proteste- marshim, si reagim pas vrasjes së të riut Klodian Rasha nga një efektiv i forcave Shqiponja.
Protesta është parashikuar të nisë në orën 18:00 dhe sikurse raportohet grumbullimi do të nisë në Sheshin “Skënderbej” për të vijuar më pas në formë marshimi në bulevardin “Dëshmorët e Kombit” dhe Drejtorinë e Policisë.
Edhe ditën e sotme rreth 900 forca policore do të jenë në terren, ndërkohë që nga autoritetet marshimi është konsideruar i paligjshëm për shkak të ndalimit të grumbullimeve në situatën Covid.
Aktualisht ka një numër të madh të efektivëve të policisë të pozicionuar në institucionet kryesore.
Autobotët për shpërndarjen e turmave janë vendosur pranë Ministrisë së Brendshme, Kryeministrisë, por dhe pranë Drejtorisë së Policisë.
Në kërkesat e protestës, të paraqitura në rrjetet sociale artikulohet shkarkimi i Drejtorit të Policisë Ardi Veliu dhe reformimi i Policisë së Shtetit./Opinion.al
