Ambasadori i BE në Shqipëri, Luigi Soreca kërkoi nga qeveria shqiptare, që të përdori çdo mundësi për të vendosur dialog me aktorët e medias duke nënvizuar se ajo është përgjegjëse për krijimin e një mjedisi të favorshëm për lirinë e medias.
“Është koha për të ndjekur procesin e konsultimit me komunitetin e medias mbi draftin e ndryshimeve në lidhje me ligjin për median, duke marrë parasysh ekspertizën e aktorëve ndërkombëtarë, në mënyrë që të sigurohet një ndikim pozitiv i paketës legjislative mbi lirinë e shprehjes”, deklaroi Soreca.
Gjatë fjalës së tij në Forumin e 6-të të OSBE për Zhvillimin e Medias, Soreca citoi raportin e BE të vitit 2020 për Shqipërinë, që u botua muajin e kaluar, ku theksohet se Shqipëria nuk ka bërë përparim në fushën e lirisë së shprehjes.
“Në raportin e vitit 2020 për Shqipërinë të botuar muajin e kaluar, Komisioni theksoi shqetësimet e tij serioze se Shqipëria nuk ka bërë përparim në fushën e lirisë së shprehjes. Komisioni raportoi raste të dhunës policore ndaj gazetarëve në kontekstin e demonstratave. Ai bëri thirrje për tolerancë zero ndaj frikësimit, kërcënimeve dhe sulmeve kundër gazetarëve dhe medias, përfshirë në diskursin politik. Këshilli nënvizoi se ndryshimi i ligjit për median në përputhje me rekomandimet e Komisionit të Venecias mbetet një përparësi e rëndësishme”, tha ambasadori Soreca.
Kreu i Delegacionit të Bashkimit Evropian në Shqipëri, deklaroi gjithashtu se pandemia solli valë të reja keqinformimi dhe lajmesh të rreme, duke vënë në pikëpyetje gazetarinë cilësore dhe duke shtuar kërkesat për ndjenjën e detyrës dhe përgjegjësi në raportimin e fakteve.
Soreca i quajti heroike raportimet e gazetarëve gjatë tërmetit dhe tani gjatë pandemisë, dhe po aq heroike tha se janë shkrimet që denoncojnë korrupsionin, krimin e organizuar, shkatërrimin e mjedisit, abuzimet me fondet pubike dhe me sigurinë ushqimore, për të cilat kanë dhënë mbështetje të gjerë. /Opinion.al
