Presidenti Ilir Meta i ka shprehur sot mirënjohjen trajnerit të peshëngritjes Ferid Berberi duke sjellë edhe disa kujtime nga koha kur ai ushtronte këtë sport.
Në mesazhin e tij falenderues për profesor Berberin, presidenti ka ndarë me publikun edhe një foto të 35 viteve më parë gjatë stërvitjes në peshëngritje dhe shton se falë trajnerit të tij ka qenë “përherë në superformë për të ngritur vetëm pesha të rënda”
Në foto duket presidenti Meta dhe dy ish-peshëngritësit Bashkim Mullai dhe Ardian Kokonozi.
“I lumtur sot të kthehesha 35 vite pas në kohë për të ndarë kujtime të jashtëzakonshme për një periudhë shumë të bukur të jetës sime, me Profesorin tim të dashur, Ferid Berberi, ish-trajnerin e madh të peshëngritjes së Ekipit Kombëtar e Dinamos dhe të kampionëve Aleksandër Kondo, Agron Haxhihyseni, Ardian Kokonozi, Muharrem Berisha e shumë të tjerë.
Pas arratisjes së Aleksandër Kondos, ishte Profesor Berberi i cili më tërhoqi në magjinë e peshëngritjes dhe më edukoi me shumë pasion e dashuri me vlerat më të mira sportive.
E falendëroj veçanërisht për këtë foto të bukur që më solli sot gjatë stërvitjes me dy miqtë e mi, dinamovitin Bashkim Mullai dhe Ardian Kokonozi, apo siç e quanim të gjithë Poku, Kampion i Ballkanit.
Përjetë mirënjohës Profesorit të dashur që me shumë profesionalizëm, pasion e përkushtim përgatiti denjësisht shumë kampionë të peshëngritjes shqiptare, duke mbetur një shembull i çmuar dhe përherë frymëzues i gjeneratave të tëra sportistësh në rrugën e suksesit dhe të fitoreve.
Falë tij edhe unë jam stërvitur për të qenë përherë në superformë për të ngritur vetëm pesha të rënda!”, skruan Meta. /Opinion.al
