Ministrja për Marrëdhëniet me Parlamentin, Elisa Spiropali ka reaguar përmes një statusi në rrjetin Facebook pas deklaratave të presidentit Meta gjatë ditës së sotme.
Pa e kursyer gjuhën e ashpër dhe ironike, Spiropali e cilëson Presidentin si Baba Xhikja, ndërsa shprehet se ai është gjeneral i një ushtrie të vdekur verdhushkash.
Spiropali prek gjithashtu edhe çështjen e dekorimeve të Presidentit, me të cilin një natë më parë pati një përplasje edhe përmes emisionit “Opinion”.
Kujtojmë se Spiropali u shpreh se Meta dukej sikur vinte nga një darkë kilometrike dollish, ndërkohë që zëdhënësi i Presidencës tedi Blushi e cilësoi “E çmendura E.”
Ndërkohë gjatë ditës së sotme, Presidenti ka ftuar kryeministrin Rama në debat televiziv, ndërsa u shpreh se do të tregonte lidhjet e tij me elementë kriminalë.
Postimi i plotë i Spiropalit
Kush kujton se Ilir Meta i nderon dëshmorët me teneqet që i shpërndan si verdhushkat e qypit të marrëzisë nga foltorja e Presidentit, gabon rëndë! Nuk kanë nevojë heronjtë e popullit për verdhushkat e Baba Xhikes dhe Baba Xhikja është i vetmi president në botë që dekoron njerëz të rënë në luftra që kanë ndodhur kur ai vetë nuk kishte lindur akoma! Kjo është një farse e turpshme, e neveritshme, qesharake, e cila u bë krejt kuptimplotë kur dekorata për Vojo Kushin nuk iu dha as familjes së heroit po një të panjohuri që kishte ardhur në ceremoni nga kafeneja e LSI-së afër Presidencës! Nëse ka një parti sot që i turpëron heronjtë e luftës është LSI e qypave dhe filxhanëve dhe nëse ka një individ që e turpëron shtetin shqiptar në marrëdhenie me kujtimin e tyre, ky është Baba Xhikja i Presidencës me dekoratat e tij si vula e Xhike Qamilit!
Mua nuk më komplekson asnjë qyp e asnjë filxhan i LSI sepse unë dhe Partia Socialiste luftërat çlirimtare dhe heronjtë e tyre, i kemi në ballë, i nderojme duke luftuar për Reformën në Drejtësi, për Taksimin e Ndershëm, për Librat Shkollore Falas, për Rimbursimin e Ilaçeve për më shumë se gjysëm milionë qytetarë të pasiguruar, për Rilindjen Urbane, për Mbrojtjen e Trashëgimisë Kulturore, për Shqipërinë Evropiane…
Po po, Ilir Meta është gjeneral i një ushtrie të vdekur verdhushkash që s’ka asnjë lidhje me heroizmat e me heronjtë e luftrave shqiptare për liri!
Kur ai flet per Avni Rustemin, mua më kujtohet blloku i tij i zi. Kur ai flet per Margarita Tutulanin, mua me kujtohen vilat e tualeti për macet e Monës. Kur ai flet per Vojo Kushin, mua me kujtohet Peçua i tij farmaceutik dhe me vjen për të vjellë nga nëpërkëmbja brutale e yjeve të luftës nën shollën e ushtrisë së gjeneral Xhikes! Kështu që le të lehin sa të duan, po të vërtetën time nuk e negocioj me askënd!
