Gjykata e Posaçme la në fuqi masën “arrest shtëpie” për Mimoza Margjekën, gjyqtaren e Apelit të Korçës, e cila akuzohet se ka marrë një shumë prej 6 mijë eurosh për të nxjerrë nga burgu një person, i cili akuzohet për trafik klandestinësh.
Margjeka kundërshtoi masën e sigurisë pasi, sipas saj, nuk ka asnjë provë konkrete dhe e konsideroi sërish një sulm politik pasi nuk ka njohur mandatin e kryebashkiakes së Durrësit në zgjedhjet e 30 qershorit.
Pas daljes nga dyert e gjykatës, Margjeka u përplas me forcat e policisë dhe hodhi akuza të forta ndaj gjyqtarëve, që sipas saj, kanë frikë nga vettingu.
“Po goditem politikisht. Nuk ka asnjë provë, asnjë emër. Ky shtet nuk bëhet më, po i dolët përballë shtetit për njerëzit, shkon në burg. Kërkova mediat në proces, nuk më lejuan. U bë sepse s’i dhashë mandatin kryebashkiakes së Durrësit. Nuk e meritonin mandatin, ishte mashtrim. Le të bëhet ctë dojë, nuk ja jepja mandatin. Kisha në dorë dosjen e Gjirit të Lalëzit. Shtet kriminal, mafioz, i korruptuar. “, u shpreh ajo e e irrituar.
