Deputetja e Elbasanit, Evis Kushi mori dje detyrën e ministres së Arsimit pas largimit të Besa Shahinit.
Ajo vjen nga një karrierë si pedagoge e marketingut dhe turizmit në universitetin Aleksandër Xhuvani të Elbasanit. Ministrja Kushi ka një doktoraturë në Univeristetin Staffordshire në Mbretërinë e Bashkuar me temë “Political transition , Corruption and income inequality in new democracies. Special case Albania”.
Studiuesi Vladmir Kola akuzon ministren e re të Arsimit se këtë punim e ka të kopjuar. Në një status në Facebook, ai shkruan se “70% e artikullit shkencor me titull “Political transition , Corruption and income inequality in new democracies. Special case Albania”, i vitit 2010, me autore Marsida Ashiku dhe Evis Kushi, është kopjuar nga një tjetër artikull shkencor me titull “Political Transition, Corruption, and Income Inequality in Third-wave Democracies”, i vitit 2007, me autor Eric Chang.”
Për të mbështetur argumentin e tij ai ka sjellë edhe dy punimet në fjalë dhe ka bashkëngjitur foto të paragrafëve të punimeve të cilat janë të njëjta.
“Madje, është edhe interesante të vihet në dukje se disa vlera numerike në përqindje, që gjenden në artikullin origjinal (2007, faqja 13) për shtete të ndryshme të Azisë, në lidhje me perceptimin e pabarazisë, janë paraqitur të njëjta si vlera në artikullin e kopjuar (2010, faqja 34) për ca qytete të Shqipërisë. Pra, në artikullin e kopjuar, thjesht janë hequr shtetet e Azisë dhe në vend të tyre janë vendosur ca qytete të Shqipërisë, por vlerat numerike, në lidhje me perceptimin e pabarazisë, janë të njëjta në artikullin e vitit 2007 (shtete të Azisë) dhe 2010 (qytete të Shqipërisë). Edhe konkluzionet, në artikullin e vitit 2010 janë të njëjta me konkluzionet e artikullit të vitit 2007.”, shkruan Vladimir Kola. /Opinion.al
