Bojkoti i Superligës nuk po arrin ende të gjejë gjuhën e dialogut, mes qeverisë dhe FSHF, pas disa kërkesave të kësaj të fundit drejtuar shtetit. Për këtë arsye, përfaqësuesit e qeverisë kanë patur sot në një dalje publike për të sqaruar situatën e krijuar.
I ngarkuar për këtë zgjidhje, deputeti Fidel Ylli është shprehur se përfaqësuesit e FSHF-së kanë refuzuar takimin, ndërsa tha se kërkesat e ngritura nga federata janë në fakt kërkesa të presidentit të saj.
Ndërkohë, Ministrja e Financave Anila Denaj u shpreh se ka një vullnet të qeverisë për të zgjidhur çështjet e sportit, por futbolli nuk mund të përdoret si një mjet shantazhi ndaj qeverisë.
“Dje nuk ka pasur një komunikim dhe sot dalim publikisht për dy arsye. E para për kërkesat dhe për të shpjeguar se çfarë ka bërë qeveria Rama për sportin në vitin e fundit. Futbolli nuk mund të jetë mjet shantazhi. Kërkesat për investim janë. Nuk është viti i duhur, nuk e pranuam as vjet. Në ligjin e tatimit të të ardhurave kemi miratuar dy ndryshime. Kemi rritur nga 3 në 5 për qind shumën e zbritshme. Së dyti, për çdo kompani me shpenzim mbi 100 milionë lek, njohim trefishin e sponsorizimit. Kjo është një zgjidhje për financim të shëndetshëm. Kemi folur për formalizim. Është një përpjekje e qeverisë prej ditës së parë. Kemi folur për informalitet në tregun e punës, ku nuk bën përjashtim as futbolli. Kuptojmë nevojën për kohë dhe kemi miratuar që për dy vite të mos njihet tatimi mbi pagën. Kërkesa është që të bëhet 10 vite, por është një kohë shumë e gjatë. Kërkesa e tretë është ajo e faljes së kamatave. Ndihemi krenarë që për energjinë, që u formalizua dhe e justifikoi faljen e kamatëvonesave. Jemi të hapur për të diskutuar. Kërkesa tjetër lidhet me TVSH-në, nga 20 për qind në 6 për qind. E kemi miratuar këtë vit për të gjitha ndërtimet në ambiente sportive. Të kërkosh për çdo shërbim, bëhet fjalë për një kërkesë shumë të zgjeruar”./ Opinion.al
