Pas vendimit të autoriteteve greke për të njohur deri më 31 Dhjetor të gjitha pasaportat e shtetasve shqiptarë, të cilat skadojnë brenda vitit 2020, Ministria për Evropën dhe Punët e Jashtme, njofton se emigrantëve shqiptarë nuk do t’u kërkohet as leje kalimi për të hyrë nga Greqia në Shqipëri.
“Ministria për Evropën dhe Punët e Jashtme bën me dije se nga Zyrat e të Huajve të shtetit grek, deri në datën 31 dhjetor 2020, do të pranohen si dokumente të vlefshme të gjitha pasaportat shqiptare, të cilat kalojnë afatin e vlefshmërisë brenda vitit 2020. Ky vendim i qeverisë greke krijon lehtësi për emigrantët shqiptarë, të cilët do të mund të marrin shërbimet e nevojshme në shtetin grek, duke përfshirë rinovimin e lejeve të qëndrimit, shërbimet e mbrojtjes sociale, shëndetësore e arsimore. Gjithashtu, emigrantëve shqiptarë nuk do t’ju kërkohet leje kalimi në rast të udhëtimit të tyre nga Greqia për në Shqipëri”, bën me dije në njoftimin e saj Ministria e Jashtme e Shqipërisë.
Kujtojmë që këto lëshime vijnë pas një situate kaotike të krijuar në pikën kufitare të Kakvijës, për shkak të rregullave të qeverisë greke lidhur me Covid./Opinion.al
