Shqipëria është përfshirë këtë verë nga një situatë prezente e zjarreve në disa qarqe të vendit. Ministria e Mbrojtjes ka bërë me dije se aktualisht janë 10 vatra aktive, por që janë nën monitorim dhe nuk përbëjnë rrezik për qytetarët. Njoftohet se në terren për të mbështetur forcat zjarrfikëse janë shtuar edhe 200 efektivë të Forcave të Armatosura.
Qendra Kombëtare Operacionale e Mbrojtjes Civile bën me dije se në Lezhë janë aktive 4 vatra zjarri, në njësinë administrative Shëngjin, zona Rëra e hedhur-Maja e Zezë dhe po punohet për izolimin e tyre.
Ndërkohë, zjarri në malin e Kakarriqit është izoluar pothuajse totalisht. Ndërsa në Rubik, në fshatin Katund i Vjetër, vatra ka intensitet të ulët dhe është nën monitorim. Në Elbasan ka patur një vatër zjarri në Gramsh në fshatin Siman.
Në Fier nga 3 vatra, 2 tashmë janë lokalizuar dhe janë drejt përmirësimit. Situata është nën kontroll edhe në fshatin Hekal në Mallkastër, ku u raportua për zjarr në sipërfaqe me shkurre ullishte dhe pemëtari pasditen e së martës.
Vështirësi ka paraqitur terreni në njësinë administrative Terpan në pyllin e Ballollit në Berat, por zjarri nuk përbën rrezik për komunitetin, pasi ndodhet larg zonave të banuara.
