Shtetet e Bashkuara hodhën poshtë një kërkesë nga linjat ajrore kineze për fluturime shtesë javore midis dy vendeve. Por sipas autoriteteve vendimi nuk kishte për qëllim të përshkallëzojë tensionet për kufizimet e udhëtimit.
Në një deklaratë, Departamenti i Transportit të SHBA-së tha se vendimi ishte marrë për “ruajtjen e barazisë” në shërbimet e planifikuara të pasagjerëve midis dy vendeve, duke shtuar se ishte i gatshëm të rishikonte vendimin nëse autoritetet kineze të aviacionit rregullonin politikat e tyre që ndikojnë transportuesit e SH.B.A.
“Departamenti u ka përcjellë homologëve tanë kinezë mesazhin se ky urdhër është vetëm çështje procedurale dhe se nuk duhet të shihet si përshkallëzim nga ana jonë,”- thuhet në deklaratën e Departamentit të Transportit.
Në fillim të kësaj jave, Shtetet e Bashkuara dhe Kina thanë që secila do të lejonte katër fluturime javore midis dy vendeve./Opinion.al
