Deputeti Damian Gjiknuri tha në një lidhje në emisionin “Opinion” se marrëveshja zgjedhore ka një rrezik real për të mos u votuar në parlament. Kemi parasysh faktin që opozita parlamentare ka deklaruar se nuk do ta votojë marrëveshjen dhe mazhoranca nuk i ka 84 votat e nevojshme.
Fevziu: Sa vota ka PS dhe aleatët në parlament?
Gjiknuri: Po rreth 78 vota mos gaboj.
Fevziu: Ndërkohë duhen 84 vota për ta kaluar marrëveshjen, apo jo? A rrezikon që deputetët që quhen opozitë ta bllokojnë këtë marrëveshje?
Gjiknuri: Ky rrezik është real dhe ne do të tentojmë dhe do ta diskutojmë edhe në parlament. E vështira në këtë reformë që nuk ka ndodhur asnjëherë në Shqipëri, është që kemi dy pole opozite, një jashtë parlamentit që përfaqëson një pjesë të konsiderueshme të votave të opozitës dhe një në parlament.
Fevziu: Si do t’ju thoni këtyre deputetëve: na votoni këtë që firmosën ne? Kjo është dhe shpërfillje për ta.
Gjiknuri: Unë gjithmonë shpresoj tek koshienca kombëtare për interesa të mëdha. Por nëse vërtet dështon, Shqipëria nuk është pa ligj zgjedhor.
Fevziu: Kur do të jenë zgjedhjet?
Gjiknuri: Nga 15 Prill në 15 Maj dhe këtë e ka presidenti për të përcaktuar një nga të dielat brenda këtij harku kohor./Opinion.al
