Plagosja e sotme ndaj Ardian Çapjas tregon për një atentat të mirëmenduar ndaj tij megjithëse i vështirë për tu ekzekutuar pasi autorët kanë qëndruar në distancë nga objektivi.
Por ky nuk është atentati i parë ndaj Çapjas. Pas vrasjes së vëllait të tij në vitin 2016, familja u vu në shënjestrën e disa goditjeve me armë. Fillimisht u tentua vrasja e Florenc Çapjas pranë gjykatës së Elbasanit dhe më pas 2 herë është bërë atentat ndaj Ardian Çapjas.
Në gusht të vitit 2017 ndaj banesës ku qëndronte Ardian Çapja është goditur me predhë anti-tank por ajo nuk shpërtheu. Më pas një atentat i dytë brenda vitit është organizuar ndaj tij.
Autorët , të cilët ende nuk janë identifikuar, për të shmangur çdo dyshim, kishin modifikuar automjetin e përdorur prej tyre në mënyrë identike me atë të një prej fqinjëve të fisit Çapja, duke përdorur dhe targa të falsifikuara me numra të njëjtë. Pasi e kanë mbajtur nën vëzhgim për disa ditë, autorët kanë ndërhyrë në momentin kur Ardian Çapja po dilte nga banesa e tij. Ata kanë qëlluar nga një distancë e largët në momentin kur 49- vjeçari ka qenë pranë derës.
Kur ka dëgjuar të shtënat, menjëherë ai është futur brenda duke u shpëtuar plumbave. Nga rindërtimi i ngjarjes, sipas grupit hetimor, Çapja i ka pikasur autorët dhe kjo ka bërë që këta të fundit të qëllojnë nga një distancë e largët.
Fytyra e tij është bërë e njohur për publikun pasi gazetari Artan Hoxha publikoi në një nga emisionet “Opinion” një foto të tij me kryeministrin Rama e cila ishte bërë në ambjentet e hotel “Univers” në pronësi të familjes Çapja.
Familja Çapja ka qenë shënjestra e masakrës së shkurtit të vitit 2016 ku në një lokal në pronësi të tyre u qëllua me kallashnikov dhe pati tre viktima dhe pesë të plagosur mes të cilëve dhe njëri nga vëllezërit e Ardian Çapjas.
Në mars të vitit 2019, në qendër të qytetit vritet në mes të Elbasanit, avokati i familjes Çapja, Ravik Gurra.
Të dyja ngjarjet e mësipërme janë ende të pa zbardhura. Ato dyshohet të jenë rezultat i konfliktit të grupeve kriminale në qytet për trafikun e drogës.
Familja Çapja ka gjithashtu probleme hasmërie. në vitin 2005, ku Sokol Çapja u përfshi në konflikt me ish-kreun e Qarkullimit Rrugor në Elbasan, Fadil Mema. Pas kësaj ngjarjeje mbeti i vrarë Sokol Çapja dhe si autorë u akuzuan nipat e oficerit të Policisë. Kjo pasoi me vrasjen e kunatit të Memës, Ardian Ibrahimi, në maj 2006.
Në vitin 2012, Gentian Beqiri, një nga të akuzuarit për vrasjen e Sokol Çapjes, u ekzekutua, ndërsa ishte lënë në arrest shtëpie. Ndërsa në mars 2015, në Torino të Italisë, u ekzekutua Fadil Mema.
Për këto ngjarje, nipi i Ardian Çapjas, Florenc Çapja ishte i dyshuari kryesor por ai u shpall i pafajëshm më herët gjatë këtij viti. /Opinion.al
