Një person mbeti i plagosur në orët e para të së dielës në Kavajë, si pasojë e një sulmi me armë zjarri. Policia jep detaje mbi ngjarjen, duke vënë në pranga edhe autorin e dyshuar të saj.
Sipas policisë, i plagosuri është 29-vjeçari M. Xh., ndërsa njofton se ngjarja ka ndodhur pas një konflikti për motive të dobëta tek ish-fabrika e letrës. Shtetasi M. Xh., 29 vjeç, u dërgua në spitalin e Durrësit dhe është jashtë rrezikut për jetën, ndërsa u bë arrestimi në flagrancë i shtetasit V. H., 27 vjeç, banues në Kavajë, i dyshuar si autori kryesor i ngjarjes, kryer në bashkëpunim me shtetasit S. V., 40 vjeç dhe E. C., 35 vjeç.
Grupi hetimor ka sekuestruar në cilësinë e provës materiale automjetin që drejtohej nga shtetasi V. H., brenda të cilit u gjetën një gëzhojë, një antiplumb, 4 aparate celular, si dhe një automjet tjetër në pronësi të shtetasit V. H.
Materialet hetimore në lidhje me këtë ngjarje i kaluan Prokurorisë pranë Gjykatës së Shkallës së Parë Kavajë, për veprime të mëtejshme, për veprat penale “Vrasja me paramendim’’ e mbetur në tentativë, kryer në bashkëpunim dhe “Mbajtja pa leje dhe e armëve, armëve shpërthyese dhe municionit”./Opinion.al
