Çështja e godinës së Teatrit Kombëtar ka ngjallur debate në seancën e sotme të Kuvendit.
Deputetja Hajdari bëri thirrje në fillim që mazhoranca të tërhiqet nga projekti i prishjes së godinës së Teatrit Kombëtar. Por pas saj ministrja Spiropali tha se teatri i ri do të ndërtohet dhe se një të tillë Shqipëria nuk e ka patur.
“Sa i përket çështjes së teatrit. Zonja Hajdari ja ku bashkoheni ju me ata që bashkoheni aty. Ata nuk janë as politikanë as korifej të artit. Ata janë ca politikanë teatralë që gjithë jetën janë tallur, jo vetëm me vendin, por edhe me veten dhe vendimet që kanë dhënë. Të jeni të bindur që Teatri Kombëtar i Shqipërisë do të ngrihet aty. Më i mirë, më i bukur dhe më dinjitoz se kurrë. Nuk kemi patur teatër moj zonjë. Kanë qenë ca tru shplarë aty që e mbajnë veten për korifej, jo artistët ata që i përdorin. 98% e artistëve që i kanë dhënë shpirt asaj skene do të vazhdojnë të jetojnë aty përmes artit në një skenë dinjitoze”, tha Spiropali.
Hajdari i ka kërkuar Spiropalit që të kërkojë falje për mënyrën se si foli në parlament për artistët.
“Unë nuk e dija që ju ishit edhe arkitekte, por duhet t’ju vijë turp që ofendoni artistët në këtë mënyrë. Duhet të kërkoni falje në këtë parlament”, u shpreh Hajdari. /Opinion.al
