Policia ka dokumentuar ngjarjen e ndodhur ditën e djeshme dje tek Ura e re e Bunës në Shkodër ku mbeti i plagosur 50-vjeçari Gëzim Bici.
Është arrestuar autori i ngjarjes Hasan (Bardh) Isufi, me precedent penal të mëparshëm në fushën e krimeve të rënda ndaj personit. Sipas policisë konflikti ka ndodhur për shkaqe pronësie.
“Në përfundim të veprimeve, specialistët për Hetimin e Krimit në Komisariatin e Policisë Shkodër bënë arrestimin në flagrancë të shtetasit H. I., alias B. I., 59 vjeç, banues në Shkodër, pasi ky shtetas, për motive pronësie, plagosi me armë zjarri shtetasin G. B, 50 vjeç, i cili ndodhet jashtë rrezikut për jetën.”
Arma e krimit nuk është gjetur ende ndërsa vijon puna për gjetjen e saj me polumbarë, pasi dyshohet se autori, pas plagosjes, mund ta ketë hedhur në lumin Buna.
Materialet iu referuan Prokurorisë së Rrethit Gjyqësor Shkodër, për veprën penale “Vrasja me paramendim, e mbetur në tentativë”. /Opinion.al
