Ministria e Shëndetësisë në përditësimin e të dhënave mbi situatën e koronavirusit në vendin tonë raportoi disa fakte të cilat e bëjnë më optimiste gjendjen në vendin tonë.
Së pari Tirana, Kruja dhe Shkodra janë tre vatrat nga ku po raportohen rastet e reja me COVID-19. Kjo situatë vijon e tillë prej pothuajse një jave, me raste sporadike jashtë tre vatrave kryesore. Ky është një lajm i mirë pasi tregon se virusi është izoluar dhe kjo e bën atë më lehtë të gjurmueshëm.
Përveç Krujës dhe Kurbinit, në Bashkitë e tjera të vendit pjesa më e madhe e të infektuarve janë shëruar. Numri i të infektuarve aktivë jashtë Tiranës, Krujës dhe Kurbinit është 41 aktualisht në të gjithë Shqipërinë.
Sipas të dhënave të raportuara ditën e sotme, numri i testimeve është më i larti i kryer ndonjëherë, 270 dhe rastet e reja nuk pësuan rritje të madhe nga dita e djeshme (vetëm 2 më shumë).
Një tjetër e dhënë pozitive për vendin tonë është se numri i të shëruarve në 24 orët e fundit ka qenë më i lartë se rastet e reja. I njejti trend vijon edhe për rastet në total ku nga 766 raste të konfirmuara 455 janë të shëruar, pra më shumë se gjysma. /Opinion.al
