Nënkryetari i Partisë Demokratike, Edmond Spaho e ka cilësuar aktrim prej kllouni përgjigjen e kryeministrit Rama për akuzat e opozitës.
Megjithëse video-mesazhi kishte nota të theksuara satirike, aty paraqiteshin shifrat e vërteta sipas qeverisë, por PD kërkon sërish publikimin e kontratave të tenderave.
LEXO EDHE – VIDEO/ Rama i përgjigjet të gjitha akuzave të opozitës
Sipas ish-deputetit Spaho publikimi i tyre do të nxjerrë në pah “vjedhjen që kryeministri dhe qeveria e tij kanë bërë dhe në këto kohë krize”.
Statusi i plotë i Edmond Spahos
Rama dhe qeveria e tij vazhdojnë të tallen dhe të përqeshin shqiptarët.
Në ditët më të vështira për qytetarët, ai harxhon kohën për të bërë montuar video dhe aktruar si klloun.
Në fakt i mjaftojnë 2 minuta që të publikojë kontratat e tenderave sekretë. Kaq mjafton që t’u përgjigjet seriozisht denoncimeve të PD dhe të mediave dhe që shqiptarët të njihen me vjedhjen që kryeministri dhe qeveria e tij kanë bërë dhe në këto kohë krize.
Shqiptarët sot nuk kanë marrë ende ndihmën që qeveria ka për detyrim ligjor t’ua japë. Varfëria kërcënon çdo ditë e më shumë familjet dhe zbraz tavolinat e shqiptarëve. Bizneset po falimentojnë dhe papunësia po rritet çdo ditë. Por Edi Rama dhe qeveria e tij nuk e kanë fare në plan të merren me hallet e shqiptarëve. Halli i tyre i vetëm është të ruajnë paratë e oligarkëve.
Shqiptarët vuajnë, ekonomia vuan, Edi Rama bën kllounin dhe sulmon opozitën për të fshehur varfërinë dhe krizën ekonomike që po pllakos çdo ditë e më shumë mbi qytetarët dhe Shqipërinë. /Opinion.al
