Komisioni i Ligjeve në mbledhjen e sotme ka vendosur të zbusë dënimet e parashikuara në ndryshimet e Kodit Penal që ka propozuar qeveria.
Në ndryshimet e propozuara që adresonin gjendjen e karantinës thuhej se kush thyen rregullat e saj dënohet me 5 vite burg. Por tashmë kjo pikë është ndryshuar duke parashikuar dënim me gjobë dhe deri në 3 vite burg.
Dënimi për përhapjen e sëmundjeve infektive, nga 10 vjet maksimumi i propozuar zbret në 5 vjet. Por nëse virusi i shpërndarë dëmton rëndë jetën e njeriut apo shkakton vdekjen e tjetrit, dënimet do të vijojnë të jenë 10 dhe 15 vjet burg.
Deputetja e PS, Edlira Bode e cila është mjeke në profesion, është shprehur se masat ndërshkimore duhet të jenë propocionale me masat e shkelura dhe pasojat.
“Masat ndëshkimore do të jenë propocionale me masat e shkelura dhe pasojat. Kam dëgjuar mjaft kritika nga dita e prezantimit, kryesisht se do shkelnin të drejtat e njeriut. Përkunrazi, mbrojnë jetën dhe shëndetin dhe nuk ka asnjë të drejtë mbi këtë. Nuk kam pasur asnjëherë propozimin që ky është varianti ideal”, tha Bode.
Ndërkohë deputetja e Partisë Socialiste Vasilika Hysi, ka theksuar se ndryshimet duhet të ishin bërë që në 2016 sipas saj virusi nuk mbaron me liberalizimin e masave.
“Ne duhet ta kishim bërë këtë ndryshim që në vitin 2016. Ky nuk është një virus që mbaron kur të liberalizojmë masat. Që të dalim e të rifillojmë vetëm pa u riskuar nga ata që u bëjnë karshillëk insttiucioneve duhet të ketë ndëshkime penale”. /Opinion.al
