Ministrja e Shëndetësisë Ogerta Manastirliu ka deklaruar se janë porositur 30 mijë teste për koronavirus.
Në një intervistë televizive, ministrja iu përgjigj akuzave të opozitës dhe kërkesave për transparencë lidhur me kapacitetet testuese në Shqipëri.
Ajo theksoi se nuk ka mungesë tamponësh dhe se fakti që testime janë bërë cdo ditë duke zbuluar vatra të reja tregon sipas saj se kapacitetet janë të mjaftueshme. Ministrja nënvizoi dhe se strategjia e testimit bëhet nga ekspertët dhe se për momentin Shqipëria ka porositur 30 mijë teste të reja.
“Nëse nuk do kishim teste nuk do bënim çdo ditë dhe nuk do kishim zbuluar vatra të tjera. Jemi duke vepruar punën çdo ditë. Stoku i tamponëve rritet, nuk kemi pasur mungesë. Sa i përket strategjisë së testimit bëhet nga ekspertët. Deri tani strategjitë ka qenë e suksesshme. Këtë po e thotë dhe OBSH. Një strategji që është e orientuar drejt rasteve të dyshuara dhe izolimit të kontakteve. Po bëhet një punë shumë e madhe në terren, sa i përket gjurmimeve dhe testimit të çdo raste. Kemi porositur 30 mijë teste të reja. në bashkëpunim me OBSH janë në procesim e sipër sipas procedurave nëpërmjet fondeve të Ministrisë së Shëndetësisë dhe do vazhdojmë të porosisim sepse është një strategji e qartë për ne, dhe sa i përket testimeve dhe kapaciteteve në spitale”, deklaroi Manastirliu. /Opinion.al
