Presidenti i Shteteve të Bashkuara, Donald Trump, i cili është kritikuar për etiketimin e koronavirusit si “virus kinez”, u shpreh se aziatiko-amerikanët nuk duhet të fajësohen për shpërthimin e sëmundjes.
“Është shumë e rëndësishme që ne t’i mbrojmë plotësisht aziatiko-amerikanët”, tha Trump, duke i cilësuar ata si “njerëz të mahnitshëm”, (por duke mos thënë asgjë për aziatikët).
Ai i bëri këto komente në një kohë kur ka gjithnjë e më shumë raportime për sulme verbale dhe fizike ndaj komunitetit aziatik në SHBA, për shkak të pandemisë.
Në një konferencë për media, javën e kaluar, Trump ka përdorur termet “virus kinez” dhe “virus i Kinës”, duke hedhur poshtë sugjerimet e gazetarëve se ato etiketime janë raciste.
“Vjen nga Kina. Nuk është fare raciste”, ka thënë Trump.
Kina, ku rastet me koronavirus janë shfaqur për herë të parë në fund të vitit të kaluar, i ka kritikuar deklaratat e Trumpit.
Organizata Botërore e Shëndetësisë, ndërkaq, ka lëshuar një udhëzim kundër “stigmatizimit të komuniteteve të caktuara” kur flitet për sëmundje.
Koronavirusi vazhdon të përhapet me shpejtësi në Shtetet e Bashkuara, ku aktualisht janë mbi 46,000 njerëz të infektuar dhe 610 të vdekur./Opinion.al
