Masat e ndërmarra për përballimin e situatës së koronavirusit janë bërë objekt akuzash mes qeverisë dhe opozitës. Më konkretisht, kreu i opozitës Lulzim Basha ka akuzua kryeministrin Rama se qeveria e tij nuk ka ndërmarrë masat e nevojshme për përballimin e situatës.
Gjatë ditës së sotme ai tha në qendrat shëndetësore janë vënë në përdorim maska të skaduara që në vitin 2011, duke vënë në rrezik jetën e stafit shëndetësor.
LEXO – Basha: Kapacitetet e spitaleve nuk i kalojnë 120 persona
Rama reagoi në Twitter duke thënë se në Shqipëri ka vetëm një palë maska të dëmshme në vendin tonë dhe ajo është e atyre që shfrytëzojnë fatkeqësitë për të përfituar pushtet.
Ka vetëm një palë maska të dëmshme në Shqipëri:Maskat e atyre që dhe kur ky vend lufton me jetën nën gërmadhat e tërmetit apo me një virus kërcënues për planetin,s’ndalen së kërkuari pushtet me shpifje,sherr,rrëmujë!Po përsëri Shqipëria do t’ia dalë sepse shqiptarët s’janë vetëm!
— Edi Rama (@ediramaal) March 10, 2020
Në një reagim live të mëtejshëm kryeministri Rama tha se sipas certifikatës së dhënë nga kompania kanadeze që ka sjellë maskat, data e skadencës nuk ndikon në efiçencën e maskave. Ai e akuzoi kreun e opozitës se po përhap panik dhe e ftoi atë të bashkëpunojnë për përballimin e situatës.
LEXO – Rama-Metës dhe Bashës: Jo task-forca të veçanta, të bashkojmë ekspertët
LEXO – Rama – Bashës: Nuk ka lidhje data e skadencës me efikasitetin e maskave
Basha nuk iu përgjigj drejtpërdrejtë ftesës së Ramës, por në vazhdën e replikave në Twitter tha se pasi Rama kishte pranuar se maskat ishin të skaduara, duhet të merrte masa reale për përballimin e situatës dhe se kjo nuk ishte një lojë.
“Më në fund e pranoi të vërtetën. Maskat janë të skaduara. Si të tilla ato nuk mund të jenë masë mbrojtëse për personelin mjekësor. Edi Rama mblidh mendjen dhe siguro jetën e qytetarëve! Lëri lojërat e fjalëve dhe fokusohu tek problemi kryesor që kanë sot shqiptarët. Nuk jemi në luftë, jemi në situatë emergjence që kërkon seriozitet dhe përgjegjshmëri. Dhe jo shfaqje me maska të skaduara mbi fytyra të skaduara“, shkroi Basha në postimin e tij të fundit.
Kësaj deklarate i është përgjigjur së fundmi përsëri kreu i qeverisë duke nënvizuar se nuk është ora për politikë por për t’i shërbyer popullit
“Ndërroje maskën dhe orën, se kjo është një orë e rëndë për Shqipërinë dhe nuk je as ti, as partia jote halli i këtij populli sot, e s’ta ka borxh askush të të shpjegojë tre herë në ditë që s’është gabim, po është faj në mos krim të nxisësh panik me të pavërteta! Nëse ty s’të duket luftë kjo e njeriut me virusin e panjohur,quaje gjendje e jashtëzakonshme a si të duash! Po vare të paktën atë fyell në mur e kurseja Shqipërisë avazin politik,se s’është koha për politikë kjo, po ora për t’i shërbyer popullit me forcën e shembullit njerëzor“, shkruan Rama.
Por mesa duket lufta për të thënë fjalën e fundit i ka përfshirë së tepërmi dy krerët e partive më të mëdha politike.
Basha me një gjuhë më të fortë i ka konsideruar rrumpallë masat dhe institucionet e menaxhuara nga qeveria dhe i ka bërë thirrje kryeministrit të marrë masa për gjendjen serioze.
“Kur gishti tregon hënën, i marri tregon gishtin. Edi Rama, ministria jote e Shëndetësisë është rrumpallë, përgatitja e qeverisë tënde për koronavirusin rrumpallë, qeveria jote rrumpallë. Mblidh veten. Boll duke u ankuar dhe duke fajësuar të tjerët për dështimet e tua. MERR MASA. të mbrosh mjekët dhe infermierët. Lëri batutat bajate,shtroju punës për të mbrojtur shëndetin e njerëzve!Ke zgjedhur ditën e gabuar të sulmosh opozitën.Bëhu burrë dhe prano përgjegjësitë e tua!Gjendja është shumë serioze!Boll u solle si klloun,nuk është koha për të qeshur me ty“ shkruhet në postimin e fundit të Bashës. /Opinion.al
