Ambasada Amerikane ka reaguar për situatën e krijuar, pas konfirmimit të rasteve të para nga koronavirusi në Shqipëri.
Përmes një postimi në rrjete sociale, Ambasada shkruan se ashtu si Presidenti Meta, Kryeministri Rama dhe Kryetari i PD-së Basha ranë dakord, kjo është një kohë për veprime të qeta dhe praktike nga publiku, dhe veprime të shpejta e të përgjegjshme nga të gjithë udhëheqësit.
Ambasada theksoi se ata do të zbatojnë masat mbrojtëse bazë të rekomanduara nga OBSH-ja, dhe do të vijojnë të mbështesin përpjekjet e qeverisë për të udhëhequr një përgjigje të bashkërenduar dhe transparente.
“COVID-19 kërkon që cilido në Shqipëri – pavarësisht se kush je – të bashkohet në frymë dhe në veprime. Ashtu si Presidenti Meta, Kryeministri Rama dhe Kryetari i Partisë Demokratike Basha ranë dakord së bashku, kjo është një kohë për veprime të qeta dhe praktike nga publiku, dhe veprime të shpejta e të përgjegjshme nga të gjithë udhëheqësit. Në këtë drejtim, edhe Ambasada do të zbatojë masat mbrojtëse bazë ndaj COVID-19 të rekomanduara nga OBSH-ja, përfshirë mbajtjen e largësisë midis personave dhe masa të rritura personale higjenike, si larja e shpeshtë e duarve. Do të vijojmë të mbështesim përpjekjet e qeverisë së Shqipërisë për të udhëhequr një përgjigje të bashkërenduar dhe transparente, e cila i mban të gjithë njerëzit në Shqipëri sa më të sigurtë, të shëndetshëm dhe të informuar që të jetë e mundur.”, shkruan ambasada amerikane./Opinion.al
