Kryeministri Rama megjithëse tha para tubimit të 2 marsit se është luks të merrej me Presidentin, e ndërtoi fjalimin e tij në Kuvend rreth tij dhe opozitës.
Me një gjuhë herë kërcënuese, herë ironike dhe herë tallëse Rama akuzoi Presidentin Meta se po mbron krimin dhe se është kundër reformës në drejtësi.
Teksa quajti aktin normativ “anti-KÇK” si shfaqjen më të fortë të vijës së kuqe mes shtetit dhe krimit, Rama tha se “i ashtuquajturi president” është pjesë e koalicionit që shqetësohet për ata “që kanë vrarë, përdhunuar, trafikuar ca kanë mundur, grabitur pronat, shantazhuar njerëzit”.
Më pas ai tha se Presidenti është në “hallin e tij” sepse sipas tij nuk ka më si garanci gjykatës e prokurorë dhe po jeton në një moment “o sot, o kurrë”
“Ilir Meta ka të gjitha arsyet që sot të jetojë në një moment si “o sot o kurrë”. Se sot vija ndarëse mes të shkuarës e të ardhmes po bëhet gjithmonë e më e pafshishme me pazaret politike kur vjen puna te drejtësia. Se sot gjykatës e prokurorë s’janë më garancia sic kanë qenë për 30 vjet, por janë gjithmonë e më shumë në hallin e tyre, sot është marrë një vendim ekstrem për ti dhënë një dërmë përfundimtare krimit të organizuar“, tha Rama.
Sipas kryeministrit Rama, 72% opinionit publik e mbështet anti KÇK, por shtoi se pjesa tjetër është ndikuar nga ata që kanë frikë “se po u vjen dita të përballen me të shkuarën e tyre”.
Ai akuzoi presidentin se po lobon në Europë për mos çeljen e negociatave dhe mori shkasë nga reagimi i ambasadores Kim për të ironizuar manifestimin e Metës.
“Hajde na tregoni që drejtësia funksionon e drejtë për te gjithë, e dinë këta që udhëheqin revolucione imagjinare, që puthin flamure, që tundin flamurin e tjetrit pa leje, lufta e paprecedentë kundër pasurive të krimit, kundër organizatës kriminale në sistemin e drejtesise është fytyra e kësaj qeverie”, tha ai.
Shqiptarëve nuk ua ha qeni shkopin tha Rama në fund të fjalimit dhe ndonëse nuk përmendi emra shtoi se “nuk ka qen që ua tregon shkopin për flamur”. /Opinion.al
