Partia Demokratike ka dorëzuar kallëzim penal në Prokurorisë e Posaçme Antikorrupsion për Erjon Veliajn, Sandër Lleshajn, Artur Bushin, Vangjush Dakon, Valbona Sakon dhe Besa Shahinin.
Padia ka si objekt të sajin pasojat e tërmetit të 26 nëntorit nga i cili humbën jetën 51 persona, u plagosën qindra të tjerë dhe u shembën mijëra banesa. Sipas kallëzimi të dorëzuar në SPAK, PD akuzon se këta zyrtarë kanë kryer veprat penale “Shpërdorim detyre” “Vrasje nga pakujdesia” në rrethana rënduese “Shkelja e barazisë së pjesëmarrësve në tendera apo ankande publike” Korrupsioni pasiv i personave që ushtrojnë funksione publike” “Korrupsioni pasiv i funksionarëve të lartë shtetëror ose i të zgjedhurve vendorë”.
Kryetari i Bashkisë së Krujës, sipas PD, është përgjegjës për viktimat e shkaktuara nga shembja e pallateve në Thumanë pasi ata ishin lejuar të futeshin në godina të shpallura të pabanuara pas tërmetit të 21 shtatorit.
“Neglizhenca kriminale e Kryetarit të Bashkisë Krujë dhe të funksionarëve të tjerë publikë, duke lejuar banorët e 2 pallateve në Thumanë të qëndronin në brendësi të këtyre godinave, të cilat ishin deklaruar të pabanueshme dhe përbenin rrezik serioz për jetën e banorëve, ka sjellë pasojën e rëndë të vdekjes së 24 qytetarëve. Kjo përbën veprën penale të “Shpërdorimit të detyrës” dhe “Vrasje nga pakujdesia” në rrethana rënduese”.
Në dokumentin e nënshkruar nga Sekretari i Përgjithshëm i PD, Gazment Bardhi, ministria e Brendshme bëhet përgjegjëse për vdekjen e Kryekomisar Bajram Hajdarmetaj, në Godinën e Konvaleshencës në Durrës, e cila ishte shpallur e pabanueshme pas tërmetit të 21 Shtatorit.
Në kallëzimin penal drejtuar SPAK-ut, listohen të gjitha rastet e dëmtimit të infrastrukturës arsimore publike, të cilat janë ndërtuar apo rikonstruktuar vitet e fundit, por janë shkatërruar si pasojë e tërmetit. Për Partinë Demokratike, shkatërrimi apo dëmtimi i këtyre objekteve është rrjedhojë e prokurime publike korruptive sipas PD, çka kanë sjellë cilësi të dobët të punimeve, duke vënë në rrezik jetën e fëmijëve.
Padia është dorëzuar në SPAK një javë më parë dhe tashmë pritet që Prokuroria e Posaçme të vendosë nëse do të nisë hetimet. Sipas PD ky kallëzim është provë për SPAK që të dëshmojë se zbatimi i ligjit është i barabartë për të gjithë, pavarësisht pozitës shtetërore. /Opinion.al
