Prej vitesh, Dashnor Osmanin nga fshati i Pocestës shkonte në qytetin e Korçës, në zonën e Pazarit, për të shitur banane. Kohët e fundit, ai kishte patur një konflikt me bashkëfshatarin e tij Zamir Topi.
Konflikti degjeneroi këtë të martë, kur 42-vjeçari Zamir Topi e goditi disa herë më sëpatë në një nga zonat më të frekuentuara të qytetit të Korçës, duke i marrë jetën. Autori u arrestua pak minuta pas ngjarjes, ndërsa në dëshminë e parë në polici ka thënë se prej kohësh me Dashnor Osmanin kishte një konflikt për një varr.
Gjithçka nisi pasi sipas tij, Osmani i kishte dëmtuar rëndë varrin e nënës së tij, pasi pranë saj prehej një i afërm i 50-vjeçarit. Sipas dëshmisë, autori është shprehur se i kishte kërkuar Dashnor Osmanit ta hiqte të afërmin nga ai varr dhe ta rivarroste më larg, si dhe t’i rregullonte varrin e nënës.
“Nuk kisha qetësi në shpirt. E takova dje dhe e paralajmërova. Më tha se këtë do ta bënte vetëm kur të vdiste. Sot shkova bleva një sëpatë 5 mijë lekë me paratë e fundit që kisha në xhep dhe e godita”, është shprehur ai./ Opinion.al
