Prokurori Anton Martini, njëherësh kandidat për në SPAK, ka dalë sërish sot para Komisionit të Pavarur të Kualifikimit. KPK vendosi të rinisë hetimet për shkak të një denoncimi të mbërritur kundër Martinit në 11 dhjetor 2019.
Denoncuesi ngre dyshime se subjekti i ka hequr dosjet hetimore disa prokurorëve, duke ia kaluar disa të tjerëve, ndërkohë që të parët nuk ishim dorëhequr. Komisioni verifikoi zëvendësimet e prokurorëve në dosjet e Prokurorisë Shkodër, gjatë kohës që Martini ka qenë drejtues.
Për këtë shkak, komisioni i kërkoi shpjegime Martinit për procedurat e riorganizimit, rishpërndarjes së çështjeve dhe zëvendësimit të prokurorëve. Është konstatuar se 10 nga 13 dosje të trajtuara më parë, i janë caktuar të njëjtit prokuror. Në një rast, zëvendësimi i prokurorit është bërë me kërkesë nga i pandehuri.
Në lidhje me këtë denoncim, Martini është shprehur; “Në nëntor 2017 jam komanduar si drejtues i përkohshëm në Prokurorinë e Shkodrës. Nuk kërkova unë të isha drejtues, madje e kam kundërshtuar, për shkak të ngarkesës që kisha me dosjet. Sa isha drejtues, nëntor 2017-qershor 2019, u angazhova për organizimin e punës. Inkurajova oficerët e policisë gjyqësore. Ndërtova marrëdhënie institucionale që ishin vënë në dyshim. U bëra pjesë e hetimit të dosjeve mbi ngjarje të rënda kriminale. Në bashkëpunim me policinë lokale rihapa disa çështje të pezulluara. Disa prej dosjeve kaluan për kompetencë në Prokurorinë për Krimet e Rënda, pasi bashkëpunimi i tyre, ishte në formën e “organizatës kriminale” dhe “grupit të strukturuar kriminal”.
Martini gjithashtu tha se riorganizimi i institucionit u vlerësua në atë kohë ndërsa tregoi detaje pse kishte transferuar disa prej çështjeve mes prokurorëve.
“Kolegia M.F. ishte komanduar si këshilltare në Prokurorinë e Përgjithshme. Nisur nga çështjet, që ajo merrej, raste me të mitur, komandova dikë tjetër aty. Për shkak se kolegu S.B. nuk kishte certifikatë sigurie dhe specifikës së disa dosjeve, vendosa aty një tjetër. Rishpërndarja e dosjeve është bërë me short elektronik. Në rast mosfunksionimi të tij, shorti është bërë manual. Përjashtim nga shorti bëjnë dosjet ku ka arrestime në flagrancë, dosje që i merr prokurori i gatshëm. Jam munduar të ketë ndarje të barabartë, por nuk evitohen ngarkesat e ndryshme mes prokurorëve, pasi një sektor mund të ketë më shumë ngarkesë se tjetri”, tha ai./ Opinion.al
