Shtatë deputetë të opozitës parlamentare kanë thirrur në interpelancë Ministren e Drejtësisë Etilda Gjonaj për ato që ata i konsiderojnë vendime “të jashtëligjshme” për shkarkimin e drejtorit të Policisë së Burgjeve dhe drejtorin e Burgut të Peqinit.
Ministrja Gjonaj njoftoi shkarkimin e dy drejtorëve pas reagimeve të forta që erdhën mbi “shëtitjen” në zonën e ish-Bllokut të Dritan Dajtit i cili u dërgua për të marrë shërbime tek një klinikë stomatologjike.
Megjithatë, për deputetët e opozitës, veprimi i Gjonajt është i dyshimtë dhe ata kërkojnë mbi c’prova u firmosën këto vendime.
“-Grupi i deputetëve kërkon sqarime mbi rastin i shkarkimit të jashtëligjshëm të drejtorit të Policisë së Burgjeve dhe drejtorit të IEVP-së Peqin , ku u konstatuan këto shkelje për këto masa ekstreme?
-Lirimet, propozimet që janë kompetenca juaj, mbi ç’baza i keni bërë? I keni parë dosjet e tyre përpara se t’i emëronit apo t’i prezantonit?”
Interpelanca do të drejtohet nga deputeti Lefter Maliqi i cili përpara se të merrte mandatin e deputetit ka mbajtur pozicionin e zëvendës drejtorit të përgjithshëm të burgut.
Në kërkesën për interpelancë, grupi I deputetëve kërkon gjithashtu sqarime mbi stituatën në burgje e cila sipas tyre është në kushte të rënduara.
“Grupi i deputetëve kërkon sqarime mbi: Situatën e rënduar në burgje, lidhur me administratën dhe të burgosurit; Shkeljet e bëra gjatë emërimeve, lirimeve dhe transferimeve të drejtuesve të IEVP-ve. Mosrespektimi i të drejtave të të burgosurve gjatë lejeve dhe transferimit të tyre”. /Opinion.al
