Sergio de Caprio, i njohur si Kapiteni “Ultimo” u bë polici më i famshëm në botë, kur më 15 janar të vitit 1993 arrestoi një prej bosëve më të mëdhenj të historisë së krimit të organizuar, Toto Rina. Kjo ngjarje në Italinë e fillim viteve ’90 u cilësua si goditja më e rëndë për mafian e kohës.
Nga ajo ditë e deri sot kapiteni “Ultim0” dhe familja e tij shoqëroheshin gjithnjë nga eskorta të policisë italiane pasi egzistonte frika e ndonjë hakmarrjeje të mundshme nga ana e klaneve mafioze siciliane.
Por 27 vite më pas, pas një vendimi të Gjykatës Administrative të rajonit të Lacios shteti italian vendosi t’i heqë eskortën kapitenit në mënyrë që “ai të jetojë i lirë”.
“Nga sot do të jetë më e lehtë të godasësh Kapitenin Ultimo. Sonte në Romë do të kujtojmë arrestimin e Toto Riina në shtëpinë e familjes sime. Ju pres bashkë me karabinierët e atëhershëm, karabinierët e përhershëm, që nuk braktisin. Falënderoj me lot në sy 157 mijë personat që më kanë mbështetur dhe më mbështesin akoma, të cilët kanë firmosur peticionin online. Dashuria juaj është një nder i madh për mua. Ju kam të gjithëve në zemër”, shkroi De Caprio në Facebook.
Toto Riina, i njohur në Itali ishte kreu i “Cosa Nostra”-s për dekada. Ai konsiderohet si urdhëruesi i qindra vrasjeve në Italinë e viteve ‘70-’80, mes tyre edhe të prokurorëve Giovanni Falcone dhe Paolo Borsellino dhe u arrestua pasi kishte kaluar 23 vite në arrati./Opinion.al
