Policia e shtetit ka reaguar në lidhje me lajmin që qarkulloi në media se 33 emigrantët kurdë dhe irakianë të kapur në Itali ishin nisur nga Shqipëria.
Në një reagim zyrtar për mediat, Policia e shtetit sqaron se nuk ka asnjë provë që mjeti lundrues i ndaluar pranë Salentos në Itali të jetë nisur nga toka shqiptare.
Në reagim ata shtojnë se një gjë e tillë nuk është thënë as në komunikimet zyrtare të autoriteteve italiane.
Reagimi i Policisë së Shtetit
Në përgjigje të interesit të medias, lidhur me lajmin e kapjes së 33 emigrantëve kurdë dhe irakianë në zonën e Salentos, Itali, Policia e Shtetit bën me dije se:
Nuk ka asnjë provë apo të dhënë që mjeti lundrues të jetë nisur nga toka shqiptare.
Gjithashtu, nuk ka asnjë komunikatë apo deklarim zyrtar të forcave policore italiane apo të ndonjë institucioni tjetër që mjeti me emigrantë të jetë nisur nga Shqipëria.
Sipas dyshimeve të para të autoriteteve italiane, nisur edhe nga shtetësia e emigrantëve, dyshohet se ata mund të kenë udhëtuar nga Turqia, nëpërmjet Greqisë, për në Itali.
Policia e Shtetit mbetet e angazhuar për të luftuar dhe goditur çdo tentativë trafikimi të qenieve njerëzore apo çdo paligjshmëri tjetër.
Policia e Shtetit, duke përfituar nga ky komunikim, i kërkon medias që ta kontaktojë për informacion zyrtar e të saktë, për të shmangur keqinformimin e publikut. /Opinion.al
