Rrebeshet e shiut dhe erërat e forta kanë përfshirë ditën e sotme të gjithë territorin e Shqipërisë duke shkaktuar edhe dëme.
Zonat e dëmtuara nga tërmeti i 26 nëntorit janë ato që i vuajnë më shumë pasojat e motit të keq. Lagjja Besëlidhja e Lezhës është mbuluar nga uji si pasojë e bllokimit të pusetave. Kjo ka vështirësuar qarkullin e banorëve dhe automjeteve.
Hidrocentralet ne Ulëz dhe Shkopet u detyruan të nisin shkarkimet për shkak te rritjes se nivelit te ujit. Aksi nacional Skuraj-Peshkopi u bllokua pjesërisht pasi pati rënia masive të gurëve.
Shtrëngatat e shiut bën që në Shkodër të dëmtohen pemët anës rrugëve si dhe tendat e godinave.
Shërbimet Publike të Bashkisë së qytetit kanë njoftuar se janë në terren për të parë situatën dhe për të ndërhyrë aty ku është e nevojshme.
Pemë të rrëzuara u raportuan edhe në Berat, ku rrebeshet e shiut nuk kursyen as zbukurimet e fundvitit.
Situata është paraqitur e vështirë edhe në Elbasan. Banorët që kanë shtëpitë pranë përroit të Zaranikës ndihen të rrezikuar nga përmbytjet. Ky përrua është fryrë për shkak të reshjeve të dendura megjithatë fatmirësisht nuk raportohen të dëmtuar.
Në kryeqytet gjithashtu niveli i Lanës është ngritur duke rrezikuar të dalë nga shtrati.
Ky mot i keq ka shkaktuar edhe një trafik të rënduar në vend, ndërsa ka patur edhe pezullime të lundrimeve detare. /Opinion.al
