Donald Trump është zyrtarisht presidenti i tretë i Shteteve të Bashkuara që është shpallur fajtor nga Dhoma e Përfaqësuesve. Kjo e fundit, e kontrolluar nga demokratët, votoi për dy akuza kundër tij: abuzim të pushtetit dhe pengim të punës së Kongresit.
Akuza e parë kaloi me 230 vota pro dhe 197 kundër, ndërsa e dyta 229-198. Tashmë do të jetë gjykimi i tij në Senat, që do të vendosë nëse ai do të ruajë postin e Presidentit apo jo. Kryetarja e Dhomës së Përfaqësuesve, Nancy Pelos, nuk tha një datë fikse se kur do t’i dërgojnë akuzat në Senat por theksoi se Trump nuk ia ka lënë zgjidhje tjetër.
Nga ana e saj Shtëpia e Bardhë lëshoi një deklaratë, ku theksohej se presidenti është “i bindur se do të shfajësohet plotësisht” gjatë gjykimit në Senat.
Kujtojmë se Trump akuzohet se i ka bërë presion Ukrainës për të zbuluar informacione për Joe Bidenin, i cili mund të jetë rivali i tij në zgjedhjet e vitit 2020, dhe djalin e tij Hunter, i cili ka punuar për një kompani ukrainase, kur Joe Biden ka qenë nënpresident i SHBA-së.
Në këmbim të ndereve nga Ukraina, Trump akuzohet se ka mbajtur dy gjëra pezull: ndihmën ushtarake për Ukrainën, në vlerë prej 400 milionë dollarësh, dhe një takim në Shtëpinë e Bardhë me presidentin ukrainas.
Me këto veprime, sipas demokratëve, Trump ka abuzuar me pushtetin, pasi ka përdorur zyrën e presidentit për përfitime politike personale dhe në dëm të sigurisë kombëtare. Ai akuzohet edhe për pengim të punës së Kongresit, pasi ka refuzuar të bashkëpunojë me ta në hetime.
Procedurat e shkarkimit kanë nisur në shtator, kur një informator – zyrtar i paidentifikuar i inteligjencës ka ngritur një ankesë zyrtare, duke shprehur shqetësim për bisedën telefonike që Trump ka zhvilluar me presidentin e Ukrainës, Volodymyr Zelensky, më 25 korrik.
Transkriptimi i bisedës ka zbuluar se Trump ka kërkuar nga Zelensky që Joe dhe Hunter Biden të hetohen për korrupsion, ndërsa biseda është zhvilluar pasi Trump ka bllokuar miliona dollarë ndihma për Ukrainën.
Ambasadori amerikan në Ukrainë, Bill Taylor, ka thënë më pas se presidenti e ka bërë të qartë se ndihma do të jepej me kusht që Biden të hetohej.
Nga ana e tij, Trump mohon se ka përdorur ndihmën ushtarake si kusht për Zelenskyn dhe në disa raste ka përsëritur se biseda e tij me udhëheqësin e Ukrainës ka qenë “perfekte”. Hetimet kundër tij i ka cilësuar si “gjueti shtrigash” nga demokratët dhe disa media./Opinion.al
