Dy persona janë arrestuar në Tiranë pasi në bashkëpunim me një tjetër kanë marrë peng dhe kanë kërcënuar me armë një 23 vjeçar maqedonas për t’i marrë një shumë prej 250 mijë eurosh.
Operacioni “Lake” u finalizua me arrestimin e 41-vjeçarit A.XH dhe 42-vjeçarit S.M. Gjithashtu u procedua në gjendje të lirë për veprën penale “Moskallëzim krimi”, 50-vjeçari S. E., lindur dhe banues në Strugë të Maqedonisë.
Njoftimi:
Policia bën me dije se forca e Posaçme “Shqiponja” në bashkëpunim me Komisariatin e Policisë Nr.1, në sajë të informacioneve të marra në rrugë operative, zhvilluan operacionin policor të koduar “Lake”.
Në këtë operacion u arrestuan në flagrancë për veprat penale “Heqje e padrejtë e lirisë” dhe “Shtrëngimit me anë të kanosjes ose dhunës për dhënien e pasurisë”, shtetasit A. Xh., 41 vjeç, dhe S. M., 42 vjeç, banues në Tiranë.
Gjithashtu u procedua në gjendje të lirë për veprën penale “Moskallëzim krimi”, shtetasi: S. E., 50 vjeç, lindur dhe banues në Strugë/Maqedoni.
Këta tre shtetas në bashkëpunim me njëri-tjetrin i kanë hequr lirinë shtetasit maqedonas D. V., 23 vjeç dhe nën kërcënimin e armës i kanë kërkuar një shumë prej 250 000 eurosh.
Materialet procedurale iu referuan për veprime të mëtejshme Prokurorisë së Rrethit Gjyqësor Tiranë.
