Teksa vlerësimi i objekteve të prekura nga tërmeti vijon, deri tani shuma që kompanitë e sigurimeve do t’u paguajnë të prekurve të siguruar përllogaritet rreth 12 milionë dollarë.
Gjatë një tryeze me kompanitë e sigurimit, drejtuesi i Komitetit të Rindërtimit, Arben Ahmetaj i ka kërkuar atyre që të paraqesin listat e përfituesve në mënyrë që të mos ketë një dëmshpërblim të dyfishtë edhe nga shteti.
Për Ahmetajn, “shifrat e dëmeve totale shkon në 12 milionë dollarë sot, me këtë vlerësim që është ende larg atij final”.
Sipas të dhënave të Autoritetit të Mbikëqyrjes Financiare, deri tani janë regjistruar 1943 banesa të siguruara që kanë pësuar dëme nga tërmeti dhe pjesa më e madhe e tyre janë të blera me kredi.
Përfaqësuesit e kompanive të sigurimit i kanë kërkuar qeverisë të hartojë një ligj të posaçëm për sigurimin nga katastrofat natyrore.
“Ndërtimi i një ligji pa vonesë në mbrojtje të konsumatorëve është i domosdoshëm, përtej kostove. Sa më i gjerë të jetë ligji, aq më i ulët do të jetë primi i sigurimit, që varion nga 10 deri në 50 euro në vit për një banese, me kompensim shumë të madh”, deklaroi Avni Ponari. /Opinion.al
