Sekretari i Përgjithshëm i Kombeve të Bashkuara, Antonio Guterres, ka paraqitur tri objektiva kryesore që duhet të arrihen deri në fund të shekullit për të lehtësuar efektet e ndryshimeve klimatike.
Duke folur në samitin dy-javor të klimës në Madrid, Guterres tha se emetimet e gazit serë duhet të ulen në 45 për qind, deri në vitin 2030-të, ndërsa deri në vitin 2050, duhet të arrihet neutralizimi i karbonit sa i përket përdorimit të qymyrit dhe gazit.
Duke theksuar nevojën që vendet të shtojnë përpjekjet në këtë drejtim, Guterres tha se, së treti, rritja e temperaturës globale duhet të arrijë kufirin në 1.5 gradë Celsius deri në vitin 2100.
“Ne duhet të zgjedhim midis dy rrugëve, atë të dorëzimit duke lënë që urgjenca e klimës të rrezikojë të gjithë në këtë planet ose rrugën e shpresës, zgjidhjes së qëndrueshme dhe të suksesshme”, tha Guterres.
Rreth 50 liderë botërorë po marrin pjesë në samit, në kuadër të të cilit synojnë të vendosin rregullat përfundimtare për zbatimin e paktit të klimës, të arritur në Paris më 2015. Ky pakt përfshin angazhimet e vendeve për të zvogëluar emetimet e tyre të gazrave serë.
Gjatë 10 viteve të fundit, katastrofat e nxitura nga ngrohja globale si ciklonet, përmbytjet dhe zjarret, kanë detyruar më shumë se 20 milionë njerëz në vit të largohen nga shtëpitë e tyre./Opinion.al
