Federata Shqiptare e Futbollit ka njoftuar qytetarët ditën e sotme në lidhje se çfarë emri do të mbajë zyrtarisht stadiumi në Tiranë.
Sipas njoftimit të FSHF-së, në procesin e zgjedhjes së emrit, pati dy oferta, dhe 4 shprehje interesi, ku kompanitë që paraqitën ofertat ishin “Air Albania” dhe “Bolv Oil”.
FSHF shprehet se në bashkëpunim me Ministrinë e Financave dhe Ekonomisë, njofton se zgjodhi shoqërinë “Air Ailbania”, ku me të është nënshkruar një kontratë 5-vjeçare, që emri i stadiumit të quhet “Air Albania Stadium”.
Po ashtu, janë bërë me dije dhe emrat e katër tribunave, ku tribuna qendrore do të mbajë emrin “Qemal Stafa”, ajo lindore do të quhet “Panajot Pano”, tribuna veriore do të quhet “Fatmir Frashëri”, ndërsa ajo jugore “Vasillaq Zëri”.
Në reagimin e FSHF, thuhet se të ardhurat nga kjo kontratë do të ndihmojnë në mirëmbajtjen e këtij kompleksi dhe modernizimin e stadiumit. “Air Albania Stadium” pritet të inauguruohet ditën e dielë, kur do të luhet ndeshja mes Shqipërisë dhe Francës.
Njoftimi i FSHF
Qendra Sportive Kuq e Zi Sha njofton opinionin publik për përfundimin e procesit të përzgjedhjes së partnerit për të drejtat e emrit të stadiumit.
Në këtë proces pati 2 oferta financiare konkrete dhe 4 shprehje interesi. Ofertuesit ishin kompania ajrore Air Albania dhe kompania e njohur e karburanteve Bolv Oil.
Këshilli i Administrimit i Qendra Sportive Kuq e Zi sha, në vlerësim të ofertave vendosi të përzgjedh shoqerinë Air Albania Shpk, përzgjedhje e cila u aprovua nga Asambleja e Përgjithshme e Aksionarëve (75% Federata Shqiptare e Futbollit dhe 25% Ministria e Financave dhe Ekonomisë).
Përfitojmë nga rasti të falenderojmë gjithashtu edhe kompanitë Bolv Oil, Sigal Uniqa Group Austria dhe Vodafone Albania për shprehjen e interesit për të qenë edhe ata sponsor të stadiumit të ri.
Dje u nënshkrua kontrata e sponsorizimit mes palëve Qendra Sportive Kuq e zi dhe Air Albania, sipas të cilës kompania ajrore Air Albania do të ketë të drejtën e vënies së emrit ‘Air Albania Stadium’.
Pra që nga sot e deri në përfundim të kontratës 5 vjecare stadiumi do të quhet Air Albania Stadium.
Shoqëria Air Albania shpk është krijuar në vitin 2018, me aksioner kryesor Turkish Airlines (49%), duke qenë në këtë mënyrë përfaqësuesi zyrtar i gjigandit botëror të fluturimeve në tregun shqiptar. Shteti shqiptar gjithashtu zotëron 10% të aksioneve të shoqerise, me anë të Albcontrol Sha.
Ndërkaq Këshilli i Administrimit dhe Asambleja e Përgjithshme e Aksionerëve të Qendra Sportive Kuq e zi ka vendosur që Tribunat e stadiumit të marrin emrat e personaliteve të historisë dhe të futbollit Shqiptar, si vijon:
– Tribuna qendrore do të emërtohet – Tribuna Qemal Stafa.
– Tribuna Lindore(Ballore) do të emërtohet – Tribuna Panajot Pano.
– Tribuna Veriore do të emërtohet Tribuna Fatmir Frashëri.
– Tribuna Jugore do të emërtohet Tribuna Vasillaq Zëri.
Në këtë mënyrë jo vetëm respektohen këto personalitete të shquar, por edhe mbahet gjallë përgjithmonë kujtesa historike e stadiumit të vjetër.
Ne e vlerësojmë këtë marrëveshje të arritur me Air Albania si një ndihmëse të rëndësishme për mirëmbajtjen në standarde bashkëkohore të këtij kompleksi, dhe aspak si një marrëveshje biznesi. Të ardhurat që do gjenerohen nga kjo kontratë do jenë të dedikuara për shpenzimet e mirëmbajtjes dhe për moderniziminin e stadiumit me të rejat më të fundit të teknologjisë.
Inaugurimi i shtëpisë së re moderne të Futbollistëve Kuq e Zi është padyshim një moment historik dhe i gëzueshëm për të gjithë.
Ju ftojmë në “Air Albania Stadium” për të mbështetur kombëtaren dhe njëkohësisht për të parë nga afër ndryshimin e madh./ Opinion.al
