Ka nisur sot seanca e jashtëzakonshme e Kuvendit për shqyrtimin e ngërcit në Gjykatën Kushtetues, konkretisht dekretin e Presidentit për emërimin e Marsela Xhaferllarit si anëtare të Gjykatës Kushtetuese.
Kryetari i grupit parlamentar të Partisë Socialiste, Taulant Balla akuzoi presidentin se po përpiqet të delegjitimojë Gjykatën Kushtetuese.
“Presidenti sot është kundërshtari më i madh i Gjykatës Kushtetutës. Presidenti po pengon plotësimin e vakancave në gjykatë e cila duhet të luajë menjëherë rolin e saj” tha Balla.
Ai shtoi se presidenti është në konflikt interesi me kryetarin e KED, Ardian Dvoranin pasi ky i fundit ka qenë pjesë e trupës së gjyqtarëve që ka gjykuar një cështje penale ndaj presidentit Meta.
“Sot dua ti bëj një apel presidentit, është e papranueshme që në cilësinë e Kryetarit të Shtetit të përgojojë drejtues të institucioneve të vendit. Nuk ndodh askund që Presidenti të marrë nëpër gojë kryetarin e KED-së. Presidenti duhet të jetë i fundit që merret me Dvoranin sa kohë që ai ka qenë një nga 5 gjyqtarët e dosjes penale kundër Ilir Metës dhe që ka patur mendim të kundërt në krahasim me 4 anëtarët e tjerë. Presidenti është në konflikt interesi me ish-gjyqtarin pasi ai mund të ketë kërkuar edhe burg për të” shtoi Balla.
Duke emëruar Marsela Xhaferllarin si anëtare të Gjykatës Kushtetuese Balla tha se Meta ka treguar se ka patur interes për të zgjedhur emrin e veçantë të personit dhe jo procedurën e parashikuar nga Kushtetuta dhe ligji. Ai i bëri thirrje Kuvendit të miratojë projekt-rezolutën e propozuar nga këshilli i Kryetarëve e cila i bën thirrje institucioneve që të injorojnë dekretin e Presidenti për emërimin e Marsela Xhaferllarit. /Opinion.al
