Kryetari i Partisë Demokratike, Lulzim Basha ka paralajmëruar se në fund të takimeve në kuadër të ‘Rrugëtimit për Shqipërinë’ do të dalë me një platformë konkrete për ti dhënë zgjidhje problematikave të ngritura nga të rinjtë.
Basha e nisi sot rrugëtimin e tij nga Elbasani. Ai tha se emigrimi i të rinjve është një nga dështimet kryesore të qeverisë Rama kështu “kthimi i shpresës për rininë dhe për shqiptarët” është zotimi i tij i parë.
Disa nga nismat e ofertës politike të PD që u zbuluan në takim ishin pagesa e një viti stazh për ata që mbarojnë universitetin për të nxitur punësimin brenda vendit. Gjithashtu Basha tha se për studentët me pamundësi ekonomike qeveria e drejtuar prej tij do të ofrojë bursa 100 euro dhe për ata që kanë të ardhura mbi 640 mijë lekë, do të ketë bursë 50 për qind të tarifës së universitetit.
“Nisëm sot plot energji nga Elbasani “Rrugëtimin për Shqipërinë” bashkë me të rinjtë e këtij qyteti.
Rinia është investimi më i madh që do të na kthehet në të ardhmen. Ndaj zotimi i parë i PD dhe e imi, është kthimi i shpresës për rininë dhe për shqiptarët.
Në fund të rrugëtimit me rininë, do të ofrojmë një platformë të plotë me zgjidhje konkrete të cilat do ti japin atyre arsye për të mos e braktisur më vendin, por për ta ndërtuar të ardhmen e tyre këtu, në Shqipëri” shkruajti kreu i demokratëve në Facebook pas takimit. /Opinion.al
