Kreu i opozitës Lulzim Basha reagoi sot në lidhje me vendimin e KQZ për ti hequr mandatin kryetarit të Bashkisë së Vorës, Agim Kajmaku.
Ai tha se ky është një poshtërim për Partinë Socialiste dhe se kjo shërben si provë që kryeministri Rama ka vendosur të qeverisë me krimin.
“Agim Kajmaku është fytyra e Edi Ramës është pasqyra e radhës se me kë qeveris ai.
Është poshtërim për PS në radhë të parë nga e cila nuk nxjerr dot kandidatë të padënuar, të pa inkriminuar, të pa korruptuar por nxjerr vetëm llumin e llumit. Është një poshtërim për gjithë shqiptarët të cilët shkëlqejnë nëpër botë ndërsa në vendin e tyre qeverisen nga kriminelë që e kanë vendin në burg
Për këdo që ka patur dyshime se 2013, 2015, 2017, 2019 janë një rastësi, tani i ka të gjitha provat që kjo ka qenë një skemë e mirë menduar e Edi Ramës ka vendosur të qeverisë me krimin” tha Basha.
Kreu i Partisë Demokratike ripërsëriti në fund të fjalës së tij se këto raste tregojnë nëvojën për zgjedhjet të parakohshme me qeveri kujdestare.
“Ka ardhur koha ti kthejmë qeverisjen shqiptarëve nëpërmjet zgjedhjeve të parakohshme parlamentare në një qeveri kujdestare që do të garantojë votën e tyre“ deklaroi Basha.
Më herët Komisioni Qëndror i Zgjedhjeve vendosi shkarkimin e Agim Kajmakut nga Bashkia e Vorës, vendim për të cilin kryeministri Rama tha se vërtetoi që ky institucion është i pavarur dhe që PS nuk mbanë pranë vetes njerëz që marrin përsipër “të shkelë ligjin e besimin tone”. /Opinion.al
