Demokratët në Dhomën e Përfaqësuesve kanë publikuar një rezolutë, përmes së cilës kanë bërë të ditur hapat e ardhshëm në hetimet e tyre për shkarkimin e presidentit amerikan, Donald Trump.
Ky dokument tregon se veprimet e rradhës do të jenë më publike dhe se rolin kryesor në seanca do ta ketë udhëheqësi i Komitetit të Inteligjencës në Dhomën e Përfaqësuesve, Adam Schiff.
Trupi i kontrolluar nga demokratët, do të votojë për fazën e dytë të hetimeve ditën e enjte, ndërsa një zëdhënës i Shtëpisë së Bardhë ka thënë se rezoluta është “mashtrim jolegjitim”.
Deri më tani, seancat janë mbajtur me dyer të mbyllura, ndërsa votimi i nesërm kërkon vetëm që procesi i shkarkimit të bëhet publik.
Republikanët kanë kritikuar demokratët për seancat e mbyllura deri në këtë pikë, në të cilat kanë marrë pjesë edhe deputetët republikanë.
Kujtojmë se presidenti amerikan, Donald Trump akuzohet se i ka bërë presion Ukrainës për të kryer hetime për korrupsion për rivalin e tij politik, Joe Biden dhe djalin e tij, Hunter, i cili ka punuar në një kompani ukrainase të gazit.
Sipas Kushtetutës amerikane, Dhoma e Përfaqësuesve ka fuqi për të shkarkuar presidentin për “shkelje të rënda dhe keqbërje”. Ndërkaq kjo është hera e katërt në historinë amerikane që ka nisur një procedurë për shkarkim të presidentit, ndonëse asnjëri prej tyre nuk është larguar nga pozita përmes këtij procesi./Opinion.al
