Pavarësisht paralajmërimeve të përsëritura të Uashingtonit, Turqia po diskuton blerjen e sistemeve të tjera S-400 nga Rusia, tha eksportuesi shtetëror i armëve ruse, Rosoboronexport.
Shefi i Rosoboronexport-it, Aleksandr Mikheyev, i tha mediave ruse se dy palët po diskutojnë për financimin dhe “kohën e dorëzimit” të sistemeve për mbrojtje raketore por nuk dha më shumë detaje.
Kujtojmë se Turqia, anëtare e NATO-s, ka marrë dërgesën e parë nga Rusia me S-400 në muajin korrik, veprim ky që u pasua me përjashtimin e tyre nga programi i avionëve luftarakë F-35 nga Shtetet e Bashkuara.
Raporti i ri vjen një ditë pasi presidenti i Turqisë, Erdogan, takoi presidentin e Rusisë, Vladimir Putin, në Soçi.
“Puna me S-400 vazhdon. Bashkëpunimi dypalësh në industrinë e mbrojtjes do të vazhdojë me vendosmëri”, tha Erdogan.
Gjatë takimit Putin dhe Erdogan ranë dakord që t’iu lejojnë forcave kurde të tërhiqen nga zonat pranë kufirit të Sirisë me Turqinë dhe që Turqia dhe Rusia të patrullojnë atje së bashku./Opinion.al
