Gjatë një vizite në Serbi, Frederic Mondoloni, Drejtor për Europën Kontinentale në Ministrinë e Jashtme Franceze, ka sqaruar për mediat se cila janë kushtet që nuk kanë plotësuar Shqipëria dhe Maqedonia e Veriut.
Arsyet e refuzimit francez për negociatat me dy vendet e Ballkanit, veç reformimit të procedurave lidhen dhe me kushtet specifike për të dy vendet. Mondoli tha se për Shqipërinë reforma në drejtësi është një kusht konkret i papërmbushur.
“Pika kryesore që dua të theksoj është se Franca nuk është kundër, por pro hapjes së negociatave, por ne kemi nevojë për dy kushte për t’u përmbushur. Për Maqedoninë e Veriut një nga çështjet është Zyra e Prokurorit Special dhe për Shqipërinë reforma në drejtësi. Këto janë çështje të rëndësishme”,- deklaroi ai për agjencinë e lajmeve që trajton çështjet e rajonit EWB (Europian Western Balkans).
Mondoloni, i cili e njeh rajonin për shkak të karrierës si ambasador i Francës në Serbi, rendit dhe një sërë çështjesh të tjera që lidhen me Maqedoninë e Veriut dhe Shqipërinë.
Ai ka sqaruar në mënyrë më konkrete se çfarë nënkupton presidenti Emanuel Macron me reformimin e procesit të zgjerimit. Sipas tij, vendet që janë në këtë proces duhet të zgjidhin problemet me funksionimin e shtetit ligjor dhe pavarësinë e medias.
“Ne kemi nevojë për të reformuar procesin e zgjerimit, në mënyrë që ta bëjmë atë më të besueshëm, të qëndrueshëm dhe mbase gradual, i cili do t’i japë disa përfitime para anëtarësimit të plotë. Qëllimi është të bëjmë të mundur që çështjet shumë të rëndësishme si sundimi i ligjit, pavarësia e mediave të zgjidhen gjatë procesit të zgjerimit. Procesi madje duhet të jetë i kthyeshëm nëse është e nevojshme. Axhenda jonë është ambicioze, kjo reformë është e vonuar dhe ka nevojë urgjente për të reformuar funksionimin e brendshëm të BE-së”,- deklaroi Mondoloni./Opinion.al
