Ministri i Jashtëm austriak Alexander Schallenberg dhe ministri në Detyrë për Europën dhe Punët e Jashtme të Shqipërisë, Gent Cakaj kanë dalë në një konferencë për mediat pas një takimi që zhvilluan mëngjesin e sotëm.
Ata folën për procesin e çeljes së negociatave për anëtarësim të Shqipërisë që pritet të marrë një përgjigje pas 10 ditësh. Kreu i diplomacisë austriake theksoi qëndrimin pozitiv vendit të tij dhe nënvizoi faktin se Shqipërisë i duhet hapur drita jeshile.
“Shqipëria dhe Austria gëzojnë raporte të shkëlqyera diplomatike dhe janë të mbështetur në histori ta pasur dhe në interesa institucionale të ngushta. Austria është një partner i Shqipërisë. Shqipëria ka përmbushur të gjitha kushtet për hapjen e negociatave për anëtarësim. Ka vazhduar suksesshëm procesi i vetingut, por edhe ngritja e trupës gjyqësore, si dhe ka intensifikuar luftën kundër korrupsionit.
Qëndrimi i Austrisë është shumë i qartë dhe ne duam të hapet drita e gjelbër me Maqedoninë e Veriut dhe me Shqipërinë. Ne jemi përpara diskutimeve të vështira, sepse ju e dini se nuk ka unanimitet në Këshill, por ajo që duhet thënë është se Austria do të mbështesë Shqipërinë. Ne do t’ju ndihmojë në të gjitha mënyrat” tha Schallenberg.
Ai foli gjithashtu edhe për Kosovën duke thënë se ajo tashmë është një realitet që meriton njohje ndërkombëtarisht.
“Kosova është një realitet, shumica e vendeve e kanë njohur, por ka disa shteteve të BE që nuk e kanë njohur. BE ka mundur të ndjekë një politikë koherente ndaj Prishtinës dhe Beogradit dhe do vazhdojë ta bëjë këtë. Duhet të presim për formimin e qeverisë në Kosovë, para se të mbajmë një qëndrim”, tha ministri i Jashtëm Austriak.
Në lidhje me temën e Kosovës foli edhe ministri në detyrë, Cakaj i cili u shpreh se procesi zgjedhor i sapo zhvilluar ishte një shembull për të gjithë rajonin se si organizohen zgjedhjet dhe me çfarë standardi të lartë ndodh ndryshimi i pushtetit.
“Nuk më takon të komentoj atë që ka thënë Vuçiç, ngaqë për politikat e tij të brendshme ne nuk mund të ndryshojmë relacionet që kemi me Kosovën. Kosova i ka dhënës shembull rajonit, se si organizohen zgjedhjet, me çfarë standardi të lartë ndodh ndryshimi i pushtetit.
Kosova ka dëshmuar se ka një elektorat mjaft të pjekur. Ne mezi po presim të nisim bashkëpunimin me qeverinë e re të Kosovës. Kosova është realitet objektiv, pavarësia e saj është e pakthyeshme dhe bashkëpunimi i dy vendeve është i pa alternativë”, është shprehur Cakaj./ Opinion.al
