Një nga emrat më të vjetër të PS-së ka pranuar për herë të parë për një përfaqësues të mazhorancës opsionin e zgjedhjeve të parakohshme. Në një intervistë televizive Majko tha se Departamenti Amerikan i Shtetit dhe Bundestagu gjerman kanë përcaktuar se legjitimiteti i zgjedhjeve lokale duhet të përcaktohet nga Kushtetuesja.
“Edhe nga ato që janë thënë nga DASH dhe nga kushtet e Bundestagut, është thënë qartazi se Gjykata Kushtetuese do të vlerësojë legalitetin e zgjedhjeve të 30 qershorit në esencë shteruese. Jam përgatitur edhe për opinion pozitiv dhe kjo është 98% e balancës, por në Parlament thashë që nëse Kushtetuesja hedh poshtë 30 qershorin, ne do të shkojmë në zgjedhje. Do të shkojmë në zgjedhje, nuk ka çfarë të diskutohet”, u shpreh Majko.
Ndër të tjera Majko pranoi se gjendja aktuale politike është e rëndë duke cilësuar edhe momentin tepër delikat në të cilin ajo po zhvillohet.
“Asnjë vend që ka qenë në statusin e Shqipërisë për të hapur negociatat me BE-në, nuk ka patur një krizë të këtij lloji. Ne jemi duke na u mbajtur këmbët dhe duke negociuar, ndërkaq jemi duke bërë një reformë nga më të thellat.
Braktisja e sistemit Kushtetues nuk ishte vetëvrasje politike, por nxiti që sistemi të shkonte gati në vetëvrasje. Do të shkonim “një zot e di se ku” nëse do të shtyheshin datat pa mbarim të zgjedhjeve lokale dhe në të mos hynim në 30 qershor”, tha Majko. /Opinion.al
