Miratimi për çeljen e negociatave për anëtarësim të Shqipërisë nga Bundestagu gjerman mbrëmjen e djeshme ka vendosur një mekanizëm të ri në lidhje me procesin e integrimit në BE.
Sipas ish-deputetes Jorida Tabaku, mekanizmi i ri përfshin dy faza vlerësuese për Shqipërinë dhe jo konferencë ndërqeveritare siç ndodh zakonisht për vendet çelin negociatat për anëtarësim
“Një mekanizëm i ri është vendosur në punë për rastin e Shqipërisë. Nuk ka më një konferencë ndërqeveritare si është e rastit me vendet që marrin një datë për negociatat por do të ketë një proces me dy faza. Shqipëria do të vlerësohet së pari për dy kritere specifike ngritjen e Gjykatës së Lartë dhe Gjykatës Kushtetuese dhe së dyti për zbatimin e rekomandimeve të ODHIR për votimin e 30 Qershorit në veçanti por dhe të gjitha rekomandimet e paplotësuara për zgjedhjet e vitit 2013, 2015 dhe 2017! Vetëm nëqfotë se këto kushte plotësohen në konferencën e parë të zgjerimit do të kemi mundësi të diskutohet për Shqipërinë për të caktuar një datë për tu vlerësuar për një konferencë të dytë ku duhen plotësuar 7 kushte të tjera ndër më të rëndësishmet është dhe hetimi dhe vendosja përpara drejtësisë e atyre që janë akuzuar për blerjen e votës!” shkruan Tabaku.
Ajo shton se procesi i monitorimit dhe vlerësimit të kushteve të reja të vëna nga Bundestagu do të “kontrollohet imtësisht nga BE-ja” dhe nënvizon se askush nuk mund të “tregojë ditën e celjes së kapitujve 23 dhe 24 të cilët do të jenë të parët.”
“Vendosja e 9 kushteve dhe 2 nënkushteve që do të hetohen dhe kontrollohen imtësisht nga BE-ja është një thuajse veçim që Shqipëria merr. Asnjë nga ligjvënësit apo qeveritarët e Shqipërisë nuk është i zoti të tregojë ditën e çeljes së kapitujve 23 dhe 24 të cilët do të jenë të parët.
Le të jenë kushtet e vendosura nga Gjermania si harta e rrugës për të dalë nga kriza e thellë politike, institucionale dhe ligjore ku është futur vet” shkruan ndër të tjera Tabaku. /Opinion.al
