Deputetja e Partisë Socialiste, Milva Ekonomi ka deklaruar se ulja e palëve politike në një tryezë do të ndodhë.
Në një intervistë për ABC News, Ekonomi theksoi se dialogu politik është shumë i rëndësishëm në ndërtimin e një demokracie. Sipas saj reforma zgjedhore është një bazë e përshtatshme nga ku mund të nisë dialogu..
E pyetur nëse midis mazhorancës dhe opozitës kanë nisur takime të profilit të ulët ajo nuk dha një përgjigje të drejtpërdrejtë por u shpreh gjithashtu se “tavolina është një gjë që do të ndodhë”.
Ekonomi shtoi gjithashtu se ky është një proces që do të kërkojë kohë duke mos dhënë kështu një përiudhë të qartë se kur do të nisë dialogu.
Mirela Milori: Zakonisht përpara se të bëhen takimet e të mëdhenjve ka disa takime të vogla në nivele me profil të ulët, personazhe pranë liderëve, por që kanë profil të ulët. Ka filluar kjo situatë, ka filluar ky shkëmbim takimesh të të tretëve, të të dytëve dhe pastaj vijmë tek të parët?
Milva Ekonomi: Zakonisht këto lloj takimesh kanë një diskrecion. Nuk di t’ju them për këtë gjë. Unë shikoj atë që diskutohet në grup se si perceptojmë reformimin vazhdueshëm të shtetbërjes në Shqipëri kështu që nisur nga kjo po mendoj që tavolina është një gjë që do të ndodhë.
Mirela Milori: Ndoshta përpara datës së marrjes së negociatave? Përpara fundit të Tetorit?
Milva Ekonomi: Ky është një proces që do marrë kohën e vet, do ketë presionin e vet edhe nga situata që po përjeton Shqipëria, por edhe fakti që vjen Donald Tusk këtu dhe flet për ardhmërinë e Shqipërisë mund të jetë një element motivi. /Opinion.al
