Biznesmeni i 16 ka përfunduar në pranga të policisë së Tiranës, si pjesë e operacionit “Informaliteti”. Bëhet fjalë për shtetasin Drilon Bareti, me detyrë administrator i subjektit “E.B.A. NDERTIM shpk”, i cili dyshohet si i përfshirë në skemën e mashtrimit të TVSH-së.
Ai dyshohet se ka konsumuar elemente te veprave penale të “Krijimi i skemave mashtruese lidhur me tatimin mbi vlerën e shtuar”, “ Falsifikimi i vulave, stampave ose formularëve” dhe “Fshehje e të ardhurave”.
Biznesmenët akuzohen se prodhonin fatura fiktive shit-blerjesh me qëllim përfitimin e TVSH-së. Sipas njoftimit të Policisë së Tiranës, vlera e faturave fiktive është 182.6 milionë lekë me një dëm prej 25.7 milionësh si rimbursim TVSH-je për buxhetin e shtetit.
Në skemën e mashtrimit janë përfshirë 50 kompani të fushave të ndryshme dhe përveç personave të arrestuar, u shpallën në kërkim edhe dhjetra të tjerë.
Mashtrimi me TVSH-në është një ndër krimet ekonomike më të shpeshta në Shqipëri, por hetimet në të shkuarën kanë dështuar të zbulojnë apo ndëshkojnë “arkitektët” e këtyre skemave. Në janar 2019, Prokuroria e Tiranës arrestoi një grup administratorësh të kompanive fiktive për një skemë të ngjashme me dëm 18 milionë euro, por bizneset VIP që u tha se ishin pjesë e skemës, nuk janë identifikuar ende.
Sipas Prokurorisë, skema më e fundit mashtruese është realizuar prej vitit 2017 përmes pesë kompanive “fantazmë”, të cilat ndonëse rezultonin me aktivitet dhe xhiro zero në Drejtorinë e Tatimeve, prodhonin fatura multimilonëshe përmes transaksioneve fiktive për llogari të kompanive të akuzuara.
Të arrestuarit: Besnik Pelivani, kompania e ndërtimit A.B.BE; Astrit Lala, kompania Leksi Security 1; Haxhi Sala, kompania Leksi Security; Ilia Dimo, kompania IBS sh.p.k; Fatmir Firi, kompania Arb &Trans Sh.p.k; Shkëlqim Prodani, kompania Red Black; Ardian Bejko, kompania “Babeko Trans”; Shpresa Joanidhi, kompania “Shpresa” sh.p.k; Mhill Ndreca, kompania “Kombeas”; Rabi Kurti, kompania “Kurti Construction”; Riza Roshi, kompania “Dorgen” sh.p.k; Rrapo Baduni, kompania “Bani/s”; Vasil Korita, kompania “Medi Pharma”; Vangjush Mbriçe, kompania C.E.C Group/ Opinion.al
