Nis zyrtarisht hetimi ndaj presidentit Ilir Meta. Komisioni Hetimor i ngritur pikërisht për këtë çështje ka votuar me 7 vota pro dhe një kundër projekt-planin, ndërsa hetimet do të zgjasin deri në 9 tetor 2019.
Ai që votoi kundër ishte Adriatik Alimadhi, ndërsa dhe deputeti tjetër i opozitës së re Alban Zeneli ka kërkuar shtyrjen e nisjes së punimeve të këtij Komisioni deri në ngritjen e Gjykatës Kushtetuese.
Në projekt-planin e miratuar një pikë është dhe seanca dëgjimore me Presidentin Ilir Meta, por pa datë. Sipas kryetarit të këtij komisioni data do të vendoset në një tjetër mbledhje.
Kuvendi ngriti Komisionin Hetimor për shkarkimin e Presidentit të Republikës më 8 korrik, duke i lënë afat deri në 9 Tetor të vlerësojë nëse Ilir Meta e ka shkelur apo jo Kushtetutën. Komisioni drejtohet nga Ulsi Manja i cili është edhe kryetar i Komisionit të Ligjeve. Komisioni ka nëntë anëtarë, 5 nga mazhoranca dhe 4 nga opozita të cilët do të vendosin për shkeljet e Metës.
Ndërkohë teksa zhvilloheshin diskutimet në komision, reagoi dhe presidenti Ilir Meta. Në një reagim në rrjetet sociale, Ilir Meta thekson se propaganda anti-President nuk ndihmon sundimin e ligjit që është kusht për çeljen e negociatave në 18 tetor nga Bashkimi Europian për vendin tonë.
“Spostimi i vëmendjes për momentin nga detyrimi për respektimin e dekretit në fuqi të 13 tetorit për zgjedhje gjithëpërfshirëse vendore nuk ndihmon për zgjidhjen e krizës, por ndihmon përshkallëzimin e saj”, thekson Presidenti.
Sipas tij kriteret e Kopenhagenit nuk janë shfuqizuar ende nga BE, ndaj respektimi i tyre është i pashmangshëm nëse ka mbetur sadopak vullnet politik për çeljen e negociatave ne 18 tetor. “Zgjedhjet janë e vetmja zgjidhje!”, thekson Meta. / Opinion.al
