Agron Duka, kryetari i PAA, ka publikuar disa foto gjatë takimit të tij me strukturat e kësaj partie në fshatin Vishaj.
Përmes një postimi në faqen e tij zyrtarë në “Facebook”, Duka shprehet se partia e tij është duke u përgatitur për një “stinë” të re politike, ku çelësat e zgjidhjes së krizës nuk i ka maxhoranca, por opozita.
Në statusin e tij, Duka është shprehur i bindur se opozita nuk duhet të pranojë asnjë marrëveshje, derisa të ngrihet qeveria tranzitore, e cila sipas tij, do të bëjë dhe përgatitjet për zgjedhjet të parakohshme, të lira dhe të ndershme.
Duka thekson se qeveria tranzitore duhet të marrë masat e duhura që vendi të mos shkojë më në kriza të politike. Kryetari i PAA, thekson gjithashtu se deputetët e në Kuvend dhe drejtuesit lokal të jenë persona që punojnë për popullin dhe jo për interesa personale.
Postimi i Agron Dukës:
Nga Vishaj, me strukturat e PAA-së, po përgatitemi për fillimin e një stine të re të politikës shqiptare, në të cilën çelësat e zgjidhjes së krizës nuk i ka më mazhoranca, por opozita. Vullneti për të mos pranuar asnjë marrëveshje, veç asaj me të cilën do të ngrihet një qeveri tranzitore, dhe do të përgatiten kushtet e nevojshme që vendi të shkojë në zgjedhje të lira dhe të ndershme, është garancia që kriza të tilla nuk do të përsëriten më.
Duhet të shembim njëherë e mirë simbiozën e politikës me krimin, tjetërsimin e zgjedhjeve dhe mungesën e përgjegjshmërisë politike që buron nga marrja dhe mbajtja e pushtetit në forma jo legjitime. Kur kjo do të arrihet, e bashkë me të do të hartojmë edhe një platformë të ndryshimeve të thella politike, kushtetuese dhe zgjedhore, vendi do të hyjë realisht në një epokë të re. Një epokë në të cilën do të mund të flasim për ato tema që sot mbahen peng nga rënia e shtetit ligjor, korrupsioni dhe kriminalizimi i politikës, siç janë bujqësia, ekonomia, zhvillimi i qëndrueshëm dhe perspektiva europiane.
Nëse beteja për pastrimin e politikës ka dominuar në debatin publik, fundi i saj do të përkojë me një vëmendje të domosdoshme për zonat rurale. Nevojat e fermerëve, nga subvencionet e drejtpërdrejta dhe çmimi i naftës deri tek infrastruktura dhe sistemet e kullimit dhe vaditjes, përbëjnë shqetësime konkrete që presin zgjidhje. Zgjidhje që PAA është gati ti ofrojë në zgjedhjet e ardhshme!/ Opinion.al E.Xh.
